2025-nji ýylyň 24-nji oktýabrynda Astrahan şäherindäki General-admiral F.M.Apraksin adyndaky Hazar deňiz we derýa ulaglary institutynda «Parahatçylygyň, howpsuzlygyň we durnukly ösüşiň bähbidine Bitaraplygyň dostlary toparynyň duşuşygy» atly BMG-niň Modeli geçirildi. Çäre Türkmenistanyň Russiýa Federasiýasyndaky Konsullygynyň (Astrahan şäheri) guramagynda Astrahan oblastynyň Daşary aragatnaşyklar ministrliginiň hem-de General-admiral F.M. Apraksin adyndaky Hazar deňiz we derýa ulaglary institutynyň goldaw ýardam bermeginde geçirildi. Duşuşyk «Hazar – Gündogaryň we Günbataryň arasyndaky köpri» atly tema bagyşlanyldy. Bu barada Türkmenistanyň DIM-niň web-saýtynda habar berilýär.
Duşuşyga gatnaşyjylar sebit ösüşiniň geljegine degişli meseleleri giňden ara alyp maslahatlaşdylar. Ulag-logistika mümkinçiliklerine, ekologik howpsuzlyga, söwda-ykdysady hyzmatdaşlygyň giňeldilmegine hem-de medeni-ynsanperwer gatnaşyklarynyň berkemegine aýratyn üns berildi. Şeýle hem Türkmenistanyň başlangyjy bilen döredilen « Parahatçylygyň, howpsuzlygyň we durnukly ösüşiň bähbidine Bitaraplygyň dostlary topary» atly halkara başlangyjynyň ähmiýeti bellenip geçildi – bu platforma bitaraplyk ýörelgeleri arkaly parahatçylyk we durnukly ösüş ideýalaryny ilerletmäge gönükdirilendir.
BMG-niň Modelinde talyp ýaşlar özleriniň işjeňliklerini görkezdiler. Duşuşygyň çäginde Astrahanyň ýokary okuw mekdeplerinde bilim alýan talyplar Parahatçylygyň, howpsuzlygyň we durnukly ösüşiň bähbidine Bitaraplygyň dostlary toparyna agza ýurtlarynyň resmi wekilleriniň wezipesinde çykyş etdiler. Ýaş diplomatlar halkara gatnaşyklary babatynda öz bilimlerini we başarnyklaryny tejribede görkezmek arkaly wekilçilik eden döwletleriň garaýyşlaryny beýan etdiler hem-de bilelikdäki çözgütleriň işläp taýýarlanmagyna gatnaşdylar.
Şeýle hem çärä Eýran Yslam Respublikasynyň, Gazagystan Respublikasynyň Russiýa Federasiýasyndaky (Astrahan ş.) Baş konsullary we Astrahan oblastynyň ýolbaşçylary gatnaşdylar.
Geçirilen BMG Modeli Hazar sebitinde köptaraplaýyn hyzmatdaşlygyň täze ugurlaryny ýüze çykarmakda we ýurtlaryň arasyndaky özara düşünişmegi pugtalandyrmakda möhüm meýdança boldy.
