«Sim-sim, açyl!» – hazynalar bilen doly gowagyň gapysyny açýan jadyly sözleri dünýäniň ähli çagalary diýen ýaly bilýärler. Sebäbi şäheriň iň baý adamynyň gyzyna aşyk bolan şadyýan Ali Baba atly oglanyň başdan geçirenleri köp asyrlardan bäri saklanyp galan rowaýata öwrüldi.
A.S.Puşkin adyndaky döwlet rus drama teatrynyň režissýory Kerim Ataýew we bu ajaýyp ertekide çykyş eden sahna ussatlary ýaş tomaşaçylara «Ali Baba» atly sahna oýnuny sowgat etdi.
Garakçylaryň ogurlan gymmatlyklaryny gizläp saklaýan gowagyna Ali Babanyň tötänleýin girendigini ýatladýarys. Uly dogany onuň tapyndysy barada bilip, talaňçylyk edip baýamak isleýär. Ýöne gowagyň Ruhy päk ýürekli Ali Baba kömek edip, açgöz we mekir Kasyma kömek etmeýär. Kasym altyn gözläp giren gowagynda garakçylaryň eline düşýär.
Ali Babany garakçylardan söýgülisi Zeýnep halas edýär. Garakçylaryň baştutany bilen bolan söweşde Ali Baba ýeňiş gazandy. Bu habary eşiden ýaşaýjylar we Beýik Ýüpek ýoly boýunça uzak ýurtlardan haryt getirýän söwdagärler rahatlyk bilen dem aldylar. Emma iň esasy zat, Ali Baba bilen Zeýnebiň durmuş gurmagyna hiç zat päsgel bermeýärdi.
Aktýorlar Magtymguly Kurbanow we Anna Hommadowa öz tebigy häsiýetleri, yhlaslylygy boýunça Ali Babanyň we Zeýnebiň keşplerine laýyk geldiler. Ýaş tomaşaçylaryň öňünde garakçylar toparynyň baştutanynyň keşbini Merdan Nurmuhammedow örän ynandyryjy ýerine ýetirdi. Gülkünç garakçy Ahmediň keşbini Wiktor Raut, açgöz we mekir Kasymy bolsa Mihaýil Rogow ýerine ýetirdi. Köpçülik sahnada çykyş edýänler we sahna bezegçisi Ýusup Şyhdurdyýew özleriniň ajaýyp lybaslary we joşgunly tanslary bilen Gündogar ruhuny döretdiler.
Paýtagtymyzyň çagalary, şeýle hem myhmanlary üçin «Ali Baba» sahna oýnuna tomaşa etmek ýekşenbe ýa-da baýramçylyk gününde has-da lezzet berer. Bu sahna oýnunyň A.S.Puşkin adyndaky döwlet rus drama teatrynyň tomaşaçylary tarapyndan ajaýyp sahna ussady we tansçy hökmünde tanalýan Kerim Ataýewiň ikinji sahnalaşdyran eseridigini bellemek gerek. Ataýewiň režissýor hökmünde ilkinji işi «Bu erkin kebelekler» atly liriki sahna oýny bolupdy.
