Türkmenistanyň paýtagtynda 12-nji noýabrda «Türkmentel – 2025» atly XVIII halkara sergi we ylmy maslahat hem-de «Halkara ulag-üstaşyr geçelgeleri: özara arabaglanyşyk we ösüş – 2025» atly halkara maslahat we sergi öz işine başlady.

Birleşdirilen foruma gatnaşan Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň maliýe-ykdysadyýet bölüminiň başlygy Delfuza Şiriýewa «Altyn asyr» elektron gazetiniň redaksiýasynyň habarçysyna «akylly» şäheriň geljegi we onuň gurluşygynyň ikinji tapgyrynyň çäklerinde amala aşyrylýan häzirki tehniki gözegçilik barada gürrüň berdi.

D.Şiriýewanyň belleýşi ýaly, ikinji tapgyry durmuşa geçirmegiň çäklerinde «akylly» ýol yşykly «aňly» ulag ulgamy, «akylly» öýler, «akylly» hasaplaýjylar we jemagat ulgamlary ýaly döwrebap tehnologiýalary ornaşdyrmak, şeýle hem elektrobuslary we elektromobilleri ulanmak bilen häzirki zaman awtomenzilini we demir ýol menzilini gurmak meýilleşdirilýär.

«Ähli gurluşyk işleri diňe ýerli kompaniýalar tarapyndan amala aşyrylýar, daşary ýurt gatnaşygy diňe enjam üpjünçiligi bilen çäklenýär. Mysal üçin, Koreýaly hyzmatdaşlar gurulýan desgalaryň tehnologiki enjamlaşdyrylyş meselelerini çözýärler» – diýip, D.Şiriýewa aýtdy.

Halkara gözden geçirişleriň we maslahatlaryň geçirilmegi hyzmatdaşlygy ösdürmek üçin uly mümkinçilikleri açýandygy we daşary ýurtly maýadarlaryň uly gyzyklanma bildirýändigini aýdyň görkezýändigi aýratyn nygtaldy.