Türkmenabat şäherindäki çagalar çeperçilik mekdebiniň mugallymy Ýelena Işankulyýewadan tälim alýan 2-nji synp okuwçysy Aziza Bäşimowa Russiýa döwletiniň paýtagty Moskwa şäherinde Çagalaryň bütindünýä festiwalynyň çäklerinde geçirilen «Dünýäniň çagalary: Döwür dostlaşdyrýar» atly bäsleşige parahatçylygy ündeýän surat eseri bilen gatnaşyp, baş baýraga mynasyp bolmaklygy başardy.
Şeýle hem Ý.Işankulyýewanyň okuwçylarynyň 4-si Azerbaýjanyň paýtagty Baku şäherinde «Dostlugyň säheri» («Dostlugun sehri») ady bilen geçirilen Çagalaryň VII halkara sungat bäsleşiginde baýrakly orunlara eýe boldular.
Şu mynasybetli Lebap welaýatynyň Taryhy we ülkäni öwreniş muzeýinde bäsleşiklerde ýeňiji bolan we baýrakly orunlary eýelän okuwçylara kubogyň, diplomlaryň we sowgatlaryň gowşurylyş dabarasy geçirildi. Örän täsirli we tolgundyryjy geçen bu dabara jemgyýetçilik guramalarynyň wekilleri, welaýat medeniýet müdirliginiň işgärleri, Lebap welaýat ýörite sungat mekdebiniň hem-de çagalar çeperçilik mekdebiniň mugallymlary, bu mekdepleriň talyplary we okuwçylary, şeýle hem ata-eneler gatnaşdylar. Dabaranyň dowamynda halypa suratkeşler, welaýat ýörite sungat hem-de çagalar çeperçilik mekdepleriniň mugallymlary çykyş edip, halkara bäsleşiklerinde ýeňiji bolan ýaş suratkeşleri gazanan üstünligi bilen tüýs ýürekden gutladylar. «Bu üstünligiň Halkara parahatçylyk we ynanyşmak ýylynda, hemişelik Bitaraplygymyzyň 30 ýyllyk şanly toýunyň giňden bellenilýän günlerinde gazanylmagy Berkarar Diýarymyzyň parahatçylyk söýüjilikli ynsanperwer syýasatynyň ýaş suratkeşleriň kalbynda döredijilik ylhamyny oýarýandygyna şaýatlyk edýär. Hut şonuň netijesinde hem bäsleşiklere gatnaşan ýaş suratkeşleriň eserleriniň mazmuny ýurdumyzyň hemişelik Bitaraplyk derejesi, onuň parahatçylyga gönükdirilen çuňňur mazmuny bilen gös-göni baglanyşyklydyr» — diýip, çykyşlarda nygtalyp bellenildi. Soňra halkara bäsleşikleriniň ýeňijilerine dabaraly ýagdaýda sowgatlar gowşuryldy. Türkmenabat şäherindäki çagalar çeperçilik mekdebiniň 2-nji synpynyň bu mekdebiň mugallymy Ýelena Işankulyýewadan tälim alýan okuwçysy Aziza Bäşimowanyň gazanan üstünligi has-da guwandyryjydyr. Ol «Geliň, dostlaşalyň!» diýen surat eseri bilen Çagalaryň bütindünýä festiwalynyň çäklerinde Russiýa Federasiýasynyň paýtagty Moskwa şäherinde «Dünýäniň çagalary: Dostlaşmagyň döwri!» («Deti mira: Wremýa družit!») ady bilen geçirilen bäsleşige gatnaşyp, dünýä belli suratkeşlerden ybarat eminler toparynyň çykaran netijesi boýunça bäsleşigiň baş baýragyna mynasyp bolmaklygy başardy. Bu ýeňiş üçin ýaş zehinli suratkeşe bäsleşigiň kubogy hem-de ýörite diplomy, şeýle hem gymmat bahaly ýadygärlik sowgat gowşuryldy. Dünýäniň 70 töweregi ýurdunyň ýaş suratkeşleriniň gatnaşan bäsleşiginde ýeňiji bolmaklyk, elbetde, uly üstünlikdir. Zehinli ýaş suratkeşiň Watanymyzyň hemişelik Bitaraplygyndan gelip çykýan ynsanperwerligi, parahatçylygy, hoşniýetli doganlyk gatnaşyklaryny ündeýän surat eseriniň ýeňiji bolmagy, Berkarar Diýarymyzyň dost-doganlyga ýugrulan daşary syýasatyna dünýäniň çar künjünde goýulýan belent sarpanyň ýüze çykmasydyr. Azizanyň gazanan bu ýeňşinde onuň mugallymy, Ýelena Işankulyýewanyň tutanýerli zähmetiniň bardygyny belläp geçmek möhümdir. Ýelena mugallymyň nakgaşlyk sungatynyň inçe syrlaryny yhlas bilen öwretmekligi netijesinde onuň okadýan okuwçylary döwlet we halkara derejesindäki bäsleşiklerde uly üstünliklere eýe bolýarlar. Ynha, ýaňy-ýakynda Azerbaýjanyň paýtagty Baku şäherinde «Dostlugyň säheri» («Dostlugun sehri») ady bilen geçirilen Çagalaryň VII halkara sungat bäsleşiginde hem E.Işankulyýewanyň okuwçylarynyň dördüsi — Nurana Jumaýewa, Gülüstan Rejepowa, Aziza Bäşimowa hem-de Dünýägözel Şadyýewa dagy baýrakly orunlara eýe boldular. Dabaranyň dowamynda yhlasly zähmeti, görkezýän ýokary netijeleri üçin öz kärine ussat mugallym Ýelena Işankulyýewa Türkmenistanyň Medeniýet ministrliginiň, şeýle hem welaýat medeniýet müdirliginiň Hormat hatlaryna mynasyp boldy. Biz geljekde hem zähmetsöýer mugallym Ý.Işankulyýewa hem-de onuň zehinli şägirtlerine sungat äleminde uly üstünlikler arzuw edýäris.
