Geçen aýda ýurdumyzyň ministrlikleri we pudaklaýyn dolandyryş edaralary tarapyndan guralan dürli çäreler — iş duşuşyklary, syýasy geňeşmeler, işewürlik gepleşikleri, forumlar ählumumy parahatçylygyň, durnukly ösüşiň bähbidine strategik hyzmatdaşlygy işjeňleşdirmäge gönükdirilendir. Bu çäreler berkarar Watanymyzyň hormatly Prezidentimiz Serdar Berdimuhamedow tarapyndan durmuşa geçirilýän «Açyk gapylar» syýasatyna üýtgewsiz eýerýändiginiň aýdyň güwäsidir.
3-nji fewralda ýurdumyzyň Daşary işler ministrliginde Rumyniýanyň Türkmenistandaky Adatdan daşary we Doly ygtyýarly ilçisi Ion Nawal bilen geçirilen duşuşykda däp bolan dostlukly gatnaşyklary mundan beýläk-de pugtalandyrmaga, ikitaraplaýyn hyzmatdaşlygy dürli ugurlar boýunça ösdürmäge özara gyzyklanma bildirilýändigi tassyklanyldy.
Ministrler Kabinetiniň Başlygynyň orunbasary, daşary işler ministri R.Meredowyň ýolbaşçylygyndaky Türkmenistanyň wekiliýeti 3 — 5-nji fewral aralygynda Birleşen Arap Emirlikleriniň Dubaý şäherinde geçirilen Bütindünýä hökümet sammitine gatnaşdy. Sammitiň gün tertibine ählumumy dolandyryş meseleleri, emeli aň tehnologiýalarynyň ösüşine, howanyň üýtgemegine, ykdysady kynçylyklary çözmäge gönükdirilen utgaşykly çemeleşmeler girizildi.
Sammitiň çäklerinde Birleşen Arap Emirlikleriniň senagat we öňdebaryjy tehnologiýalar ministri, Abu-Dabiniň milli nebit kompaniýasynyň (ADNOC) Baş direktory Soltan Ahmed Al-Jaber, BAE-niň Premýer-ministriniň orunbasary, daşary işler ministri Şeýh Abdulla bin Zaýed Al Nahaýýan, BAE-niň wise-prezidenti, Premýer-ministriniň orunbasary, Prezidentiň iş dolandyryş ministri Şeýh Mansur bin Zaýed Al Nahaýýan bilen duşuşyklar geçirildi. Gepleşikleriň dowamynda syýasy-diplomatik, söwda-ykdysady ulgamlarda türkmen-emirlikler gatnaşyklaryny ösdürmegiň esasy ugurlary ara alnyp maslahatlaşyldy.
4-nji fewralda ýurdumyzyň Daşary işler ministrliginde Malaýziýanyň Türkmenistandaky Adatdan daşary we Doly ygtyýarly ilçisi Mohd Suhaimi bin Ahmad Tajuddin bilen duşuşyk geçirilip, onda ikitaraplaýyn görnüşde, şeýle-de köptaraplaýyn meýdançalaryň, şol sanda halkara guramalaryň çäklerinde döwletara gatnaşyklary ösdürmegiň geljegi uly ugurlaryna garaldy.
4-5-nji fewralda Türkmenistanyň maliýe we ykdysadyýet ministriniň ýolbaşçylygyndaky wekiliýet Bişkekde geçirilen ikinji “B5+1” işewürlik forumyna gatnaşdy. Söwda-ykdysady, maýa goýum, tehnologiýa ugurlarynda gatnaşyklary ösdürmek maksady bilen geçirilen forum Merkezi Aziýa ýurtlarynyň, Amerikanyň Birleşen Ştatlarynyň döwlet edaralarynyň, işewür toparlarynyň wekillerini bir ýere jemledi. Forumyň çäklerinde geçirilen “tegelek stol” duşuşygynyň dowamynda makroykdysady ösüşiň, ykdysadyýeti diwersifikasiýalaşdyrmagyň, hususy pudagy goldamagyň, söwda amallaryny ýeňilleşdirmegiň, sanly ykdysadyýeti, energetika, ulag-logistika düzümlerini ösdürmegiň esasy ugurlaryna garaldy.
5-nji fewralda ýurdumyzyň daşary syýasat edarasynda Türkmenistanyň Birleşen Milletler Guramasynyň Azyk we oba hojalyk guramasy (FAO) bilen hyzmatdaşlygyna bagyşlanan utgaşykly görnüşli brifing geçirildi. Oňa Daşary işler ministrliginiň, daşary ýurtlaryň we halkara guramalaryň ýurdumyzdaky diplomatik wekilhanalarynyň ýolbaşçylarydyr işgärleri, köpçülikleýin habar beriş serişdeleriniň wekilleri gatnaşdylar. Brifingiň dowamynda 2021 — 2025-nji ýyllar üçin hyzmatdaşlygyň ýurt boýunça Çarçuwaly maksatnamasynyň üstünlikli durmuşa geçirilendigi barada habar berildi. Maksatnamanyň çäklerinde oba hojalygyny sanlylaşdyrmak, azyk ulgamlarynyň durnuklylygyny ýokarlandyrmak, ýer we suw serişdelerini rejeli peýdalanmak, daýhan hojalyklaryny goldamak babatda birnäçe taslamalar amala aşyryldy. Şeýle hem häzirki wagtda 2026 — 2030-njy ýyllar üçin hyzmatdaşlygyň ýurt boýunça täze Çarçuwaly maksatnamasyny taýýarlamak boýunça işleriň alnyp barylýandygy bellenildi.
9-njy fewralda BMG-niň Türkmenistandaky hemişelik utgaşdyryjysy Dmitriý Şlapaçenko hem-de Merkezi Aziýa ýurtlarynyň Türkmenistandaky ilçileri bilen duşuşyk geçirildi. Taraplar BMG we onuň ýöriteleşdirilen edaralary bilen hyzmatdaşlygyň möhüm ugurlaryny ara alyp maslahatlaşdylar. Şeýle-de ýakyn wagtda Aşgabatda guraljak Merkezi Aziýa ýurtlarynyň ýaş diplomatlary we beýleki döwlet gullukçylary üçin ikinji sebitleýin okuw maslahatyna taýýarlyk görmek hem-de ony üstünlikli geçirmek bilen bagly meselelere aýratyn üns berildi.
10-njy fewralda Türkmenistanyň Daşary işler ministrliginde halkara guramalaryň wekillerini «Türkmenistanyň Bitaraplygynyň 30 ýyllygyna» atly ýubileý medaly we ýadygärlik kümüş nyşanlary bilen sylaglamak dabarasy geçirildi.
Bütindünýä Saglygy Goraýyş Guramasynyň (BSGG) Aşgabatdaky ýurt boýunça edarasynyň ýolbaşçysy Ýegor Zaýsewiň hem-de Türkmenistanyň saglygy goraýyş we derman senagaty ministriniň orunbasarynyň gatnaşmagynda sanly ulgam arkaly geçirilen duşuşykda BSGG bilen ileri tutulýan ugurlarda gatnaşyklary ösdürmegiň geljegine garaldy hem-de saglygy goraýyş ulgamynda bilelikdäki başlangyçlarydyr taslamalary iş ýüzünde durmuşa geçirmäge taýýarlyk beýan edildi.
11-nji fewralda ýurdumyzyň wekiliýeti Berlin şäherinde geçirilen Germaniýanyň we Merkezi Aziýa ýurtlarynyň daşary işler ministrleriniň duşuşygyna gatnaşdy. Onda «Merkezi Aziýa — Germaniýa» formatynda ýurtlaryň hyzmatdaşlygynyň yzygiderli we netijeli häsiýete eýedigi nygtaldy. Şeýle-de sebit howpsuzlygynyň meselelerine aýratyn üns berildi. Ulag-logistika, energetika, senagat önümçiligi, himiýa pudagy, maşyn gurluşygy, saglygy goraýyş we derman senagaty, oba hem-de suw hojalyk pudaklary, maglumat tehnologiýalary, emeli aň ileri tutulýan ugurlaryň hatarynda görkezildi. Şeýle hem ynsanperwer ulgamda hyzmatdaşlygyň ähmiýeti bellenildi. Duşuşygyň jemleri boýunça ministrleriň Berlin Jarnamasy kabul edildi.
Çäreleriň çäklerinde Germaniýanyň we Merkezi Aziýa ýurtlarynyň daşary syýasat edaralarynyň ýolbaşçylarynyň Germaniýa Federatiw Respublikasynyň Federal Prezidenti Frank-Walter Ştaýnmaýer, Germaniýanyň Bundestagynyň Daşary işler boýunça komitetiniň başlygy Armin Laşet hem-de german işewür jemgyýetçiliginiň wekilleri bilen bilelikdäki duşuşyklary geçirildi. Olarda taraplar parlamentara gatnaşyklaryň ösdürilişine, halkara giňişlikde, ilkinji nobatda, BMG-niň, ÝHHG-niň çäklerinde alnyp barylýan hyzmatdaşlyga ýokary baha berdiler.
Berlin şäherinde Türkmenistanyň daşary işler ministriniň orunbasarynyň Germaniýanyň Federal Daşary işler ministrliginiň Syýasy departamentiniň direktory Dominik Mutter bilen duşuşygy geçirildi. Onda syýasy-diplomatik, söwda-ykdysady, medeni-ynsanperwer ulgamlarda ikitaraplaýyn hyzmatdaşlygyň meseleleri ara alnyp maslahatlaşyldy.
12-nji fewralda ýurdumyzyň daşary syýasat edarasynda Şweýsariýa Konfederasiýasynyň Türkmenistandaky Adatdan daşary we Doly ygtyýarly ilçisi Tomas Şteli bilen geçirilen duşuşykda dürli ugurlarda, şol sanda halkara we sebit guramalarynyň, hususan-da, BMG-niň çäklerinde döwletara gatnaşyklary ösdürmegiň geljegine garaldy.
Türkmenistanyň we Russiýa Federasiýasynyň daşary syýasat edaralarynyň ýolbaşçylarynyň telefon arkaly söhbetdeşliginde taraplar ikitaraplaýyn gün tertibiniň dürli ugurlardaky meselelerini ara alyp maslahatlaşdylar. Şunda ozal gazanylan ylalaşyklaryň iş ýüzünde durmuşa geçirilişine, öňde boljak bilelikdäki çärelere aýratyn üns berildi. Köptaraply meýdançalaryň çäklerinde, hususan-da, GDA-nyň çäginde, Hazarýaka sebitde tagallalary utgaşdyrmagyň möhümdigi nygtaldy.
10 — 12-nji fewralda Türkmenistanyň Söwda-senagat edarasynda Türkiýe Respublikasynyň eksport harytlarynyň nobatdaky sergisi geçirildi. Her ýyl doganlyk ýurduň öňdebaryjy önüm öndürijilerini bir ýere jemleýän giň möçberli ykdysady forum iki döwletiň strategik hyzmatdaşlygynyň hil taýdan täze derejä çykarylýandygyny tassyklady. “Iki döwlet — bir millet” ýörelgesine esaslanýan özara hyzmatdaşlyk iki ýurduň abadançylygynyň bähbidine gönükdirilendir.
16 — 18-nji fewralda paýtagtymyzdaky “Ýyldyz” myhmanhanasynda geçirilen “Bütindünýä saglygy goraýyş çygrynda diplomatiýa boýunça ýokary derejeli dialog” atly halkara okuw maslahaty ýurdumyzyň oňyn Bitaraplyk we ynsanperwerlik ýörelgelerine esaslanýan döredijilikli daşary syýasatynyň dabaralanýandygynyň nobatdaky güwäsi boldy. Ýokary derejeli duşuşyk häzirki döwrüň derwaýys meselelerini çözmekde halkara jemgyýetçiligiň tagallalaryny birleşdirmek üçin netijeli platformany döretmäge gönükdirildi. Bu ugurda işjeň orny eýeleýän Türkmenistanyň lukmançylyk diplomatiýasyny ösdürmek boýunça başlangyçlary parahatçylygy we durnukly ösüşi üpjün etmegiň möhüm şerti bolup durýar.
Fewral aýynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Amerikanyň Birleşen Ştatlaryna amala aşyran sapary ikitaraplaýyn hyzmatdaşlygyň taryhynda täze sahypany açdy. Saparyň dowamynda Milli Liderimiz dostlukly ýurduň tanymal syýasatşynaslary, işewür toparlarynyň wekilleri bilen duşuşdy. Iki ýurduň arasynda dürli ugurlarda alnyp barylýan netijeli hyzmatdaşlygyň döwletara gatnaşyklary mundan beýläk-de ösdürmekde uly ähmiýeti bardyr.
17-nji fewralda Daşary işler ministrliginde Indoneziýa Respublikasynyň Türkmenistanda täze bellenen Adatdan daşary we Doly ygtyýarly ilçisi Rolliansýah Soemirat ynanç hatyny gowşurdy. Duşuşykda syýasy-diplomatik, söwda-ykdysady, medeni-ynsanperwer ulgamlarda gatnaşyklary ösdürmegiň mümkinçilikleri maslahatlaşyldy. Taraplar BMG-niň çäginde öňe sürülýän başlangyçlary özara goldamak tejribesini dowam etdirmäge taýýardyklaryny beýan etdiler.
Ýewropa Bileleşigi bilen hyzmatdaşlyga bagyşlanan brifingde 2025-nji ýylda özara gatnaşyklarda edilen işleriň jemi jemlenip, 2026-njy ýylda ileri tutulýan ugurlar kesgitlenildi. Brifingiň jemleri boýunça Türkmenistanyň we ÝB-niň hyzmatdaşlygy mundan beýläk-de ösdürmäge gyzyklanma bildirýändikleri tassyklanyldy.
17-nji fewralda ýurdumyzyň Daşary işler ministrliginde Bütindünýä Saglygy Goraýyş Guramasynyň Ýewropa sebiti edarasynyň direktory Hans Klýuge bilen geçirilen duşuşygyň dowamynda bu gurama bilen hyzmatdaşlygyň esasy ugurlaryna garalyp, 2026 — 2030-njy ýyllar üçin Merkezi Aziýada saglygy we abadançylygy goldamak boýunça “Ýol kartasynyň” taslamasy ara alnyp maslahatlaşyldy. Şeýle hem Türkmenistanyň çäginde BSGG-niň temmäkä garşy göreşmek boýunça Çarçuwaly konwensiýasynyň ýerine ýetirilişi, «Bitewi saglyk» konsepsiýasynyň çäklerinde jemgyýetçilik saglygy boýunça adatdan daşary ýagdaýlara taýýarlyk, Hazar ekologik başlangyjyny ilerletmek boýunça meseleler ara alnyp maslahatlaşyldy.
Ýurdumyzyň wekiliýeti 17 — 20-nji fewralda Ženewada geçirilen BMG-niň Ýewropa ykdysady komissiýasynyň Içerki ulag boýunça komitetiniň 88-nji mejlisine gatnaşdy. Ulag arabaglanyşygyny we ulag syýasatyny ösdürmegiň meseleleri boýunça möhüm halkara meýdançalaryň biri bolan maslahatyň gün tertibiniň ileri tutulýan ugurlarynyň hataryna daşamalaryň awtomatlaşdyrylmagy, infrastrukturany sanlylaşdyrmak, halkara ulag geçelgeleriniň ösdürilmegi, kadalaşdyryjy hukuk binýadynyň utgaşdyrylmagy ýaly meseleler girizildi. Ýurdumyzyň başlangyçlarynyň ählumumy gün tertibi bilen arabaglanyşygy, şol sanda Türkmenistanyň başlangyjy esasynda yglan edilen 2026 — 2035-nji ýyllar üçin Durnukly ulagyň onýyllygy ara alyp maslahatlaşmalaryň aýratyn ugruny emele getirdi.
18-nji fewralda Türkmenistanyň Daşary işler ministrliginde 2028-nji ýylda Halkara hukugyň ýylyny geçirmäge taýýarlyk görmek we ony geçirmek boýunça 2026-njy ýyl üçin çäreleriň meýilnamasyny amala aşyrmak boýunça ilkinji maslahat geçirildi. Bu resminama guramaçylyk-usuly, ylmy-amaly, bilim, halkara hem-de maglumat-aragatnaşyk çäreleriniň toplumyny öz içine alýar.
20-nji fewralda Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli “Garaşsyz, baky Bitarap Türkmenistan — bedew batly at-myradyň mekany” ýylynda Türkmenistanyň daşary syýasatynyň ileri tutulýan ugurlary” atly maslahat geçirildi.
21-nji fewralda hormatly Prezidentimiziň tabşyrygy boýunça BMG-niň Bilim, ylym we medeniýet meseleleri boýunça guramasynyň (ÝUNESKO) işleri barada Türkmenistanyň milli toparynyň nobatdaky mejlisi geçirildi. Oňa Ministrler Kabinetiniň Başlygynyň käbir orunbasarlary, ugurdaş ministrlikleriň, pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň ýolbaşçylarydyr wekilleri gatnaşdylar. Mejlisde BMG-niň bu ýöriteleşdirilen edarasynyň çäklerindäki hyzmatdaşlygy ösdürmegiň meselelerine garaldy hem-de toparyň geçen ýylda alyp baran işleriniň jemleri, 2026-njy ýylyň meýilnamasynda bellenilen wezipeler baradaky maglumatlar diňlenildi.
23-nji fewralda Daşary işler ministrliginde Zimbabwe Respublikasynyň daşary işler we halkara söwda boýunça hemişelik sekretary Albert Ranganaý Çimbindi bilen geçirilen duşuşykda ikitaraplaýyn gatnaşyklaryň yzygiderli ösdürilýändigi, syýasy-diplomatik dialogy mundan beýläk-de pugtalandyrmaga gyzyklanma bildirilýändigi bellenildi.
Türkmenistanyň we Zimbabwe Respublikasynyň daşary syýasat edaralarynyň arasynda geçirilen syýasy geňeşmeleriň dowamynda taraplar Birleşen Milletler Guramasynyň çäklerinde hyzmatdaşlygyň ileri tutulýan ugurlaryny ara alyp maslahatlaşdylar hem-de parahatçylygy, abadançylygy, durnukly ösüşi pugtalandyrmagy maksat edinýän başlangyçlary özara goldaýandyklaryny tassykladylar. Şeýle-de söwda-ykdysady hyzmatdaşlygy ýola goýmagyň, şol sanda bilelikde işewürlik çärelerini guramagyň mümkinçiliklerine seredildi. Duşuşygyň jemleri boýunça degişli Teswirnama gol çekildi.
23-nji fewralda Daşary işler ministrliginde geçirilen Türkmenistanyň adam hukuklary babatda halkara borçnamalarynyň we halkara ynsanperwer hukugynyň ýerine ýetirilmegini üpjün etmek boýunça pudagara toparyň nobatdaky mejlisinde geçen ýylda alnyp barlan işleriň jemleri jemlenildi hem-de şu ýyl üçin möhüm wezipeler kesgitlenildi. Hormatly Prezidentimiziň Birleşen Milletler Guramasynyň Baş Assambleýasynyň 80-nji sessiýasynyň ýokary derejeli plenar mejlisinde öňe süren halkara başlangyçlarynyň ýerine ýetirilişi, şol sanda 2028-nji ýylyň «Halkara hukugyň ýyly» diýip yglan edilmegi bilen bagly wezipeler ara alnyp maslahatlaşyldy. Nygtalyşy ýaly, bu başlangyç parahatçylygyň, hyzmatdaşlygyň halkara hukuk esaslaryny pugtalandyrmakda wajyp ädimdir.
23-24-nji fewralda Mejlisiň Başlygynyň ýolbaşçylygyndaky Türkmenistanyň wekiliýetiniň Gruziýa saparynyň çäklerinde iki ýurduň kanun çykaryjy edaralarynyň wekilleriniň hem-de milli parlamentiň ýolbaşçysynyň Gruziýanyň Parlamentiniň Başlygy bilen duşuşygy geçirildi. Onuň barşynda taraplar kanunçylyk başlangyçlaryny we bilelikdäki taslamalaryň geljegini ara alyp maslahatlaşdylar. Parlamentara dostluk toparlarynyň işini kämilleşdirmek, ugurdaş toparlaryň arasyndaky gatnaşyklary pugtalandyrmak we tejribe alyşmak, netijeli gepleşikler üçin şertleri döretmek meselelerine aýratyn üns berildi. Gepleşikleriň jemleri boýunça Türkmenistanyň Mejlisi bilen Gruziýanyň Parlamentiniň arasynda hyzmatdaşlyk etmek hakynda Ylalaşyga gol çekildi.
Saparyň çäklerinde milli parlamentiň ýolbaşçysynyň Gruziýanyň Prezidenti Mihail Kawelaşwili hem-de Premýer-ministri Irakliý Kobahidze bilen geçiren duşuşyklarynda syýasy-diplomatik, söwda-ykdysady, medeni-ynsanperwer ulgamlarda hyzmatdaşlygyň möhüm ugurlary ara alnyp maslahatlaşyldy. Şunda BMG-niň we beýleki halkara guramalaryň çäklerindäki gatnaşyklara aýratyn üns berildi.
24 — 26-njy fewralda Ministrler Kabinetiniň Başlygynyň orunbasary, daşary işler ministri R.Meredowyň ýolbaşçylygyndaky ýurdumyzyň wekiliýeti Beýik Britaniýanyň we Demirgazyk Irlandiýanyň Birleşen Patyşalygynda iş saparynda bolup, iki ýurduň daşary syýasat edaralarynyň arasynda geçirilen gurluşlaýyn dialoga gatnaşdy. Türkmen tarapy BMG-niň Tertipnamasynyň ýörelgelerine, ýurduň hemişelik Bitaraplyk hukuk ýagdaýyna ygrarlydygyny, halkara jedelleriň parahatçylykly, syýasy-diplomatik ýollar bilen çözülmeginiň zerurdygyny ýene-de bir gezek tassyklady. Çäräniň jemleri boýunça Türkmenistanyň we Beýik Britaniýanyň daşary syýasat edaralarynyň arasynda 2026-2027-nji ýyllar üçin hyzmatdaşlyk etmegiň Maksatnamasyna gol çekildi.
Saparyň çäklerinde Şazada Edward, Edinburg Gersogy, Halkara Deňiz Guramasynyň Baş sekretary Arsenio Dominges, Ýewropanyň täzeleniş we ösüş bankynyň ýolbaşçysy Odil Reno-Basso bilen duşuşyklar geçirildi. Olarda deňiz ulagy we halkara gämiçilik, medeniýet, bilim ulgamlarynda türkmen-britan gatnaşyklaryny mundan beýläk-de pugtalandyrmak, maliýe, maýa goýum hyzmatdaşlygyny giňeltmek, bilelikdäki taslamalary durmuşa geçirmek meseleleri ara alnyp maslahatlaşyldy.
Iş saparynyň dowamynda Ministrler Kabinetiniň Başlygynyň orunbasary, daşary işler ministri R.Meredow Merkezi Aziýa ýurtlarynyň daşary syýasat edaralarynyň ýolbaşçylarynyň Beýik Britaniýanyň Parlamentiniň Jemgyýet palatasynyň başlygy Lindsi Hoýl bilen bolan duşuşygyna gatnaşdy. Onuň barşynda 2011-nji ýylda gol çekilen özara düşünişmek hakynda Ähtnamanyň düzgünleriniň durmuşa geçirilmeginiň, parlamentara dostluk toparlarynyň işiniň çäklerinde parlamentara gatnaşyklary pugtalandyrmak boýunça yzygiderli tagallalaryň ähmiýeti bellenildi.
Beýik Britaniýanyň we Demirgazyk Irlandiýanyň Birleşen Patyşalygynyň Parlamentiniň binasynda Merkezi Aziýa ýurtlary bilen hyzmatdaşlyk boýunça ählipartiýalaýyn parlament toparynyň agzalary, London gazna biržasynyň Baş ýerine ýetiriji direktory, Beýik Britaniýanyň Maliýe ministrliginiň ykdysady sekretary bilen bilelikdäki duşuşyklar geçirildi. Merkezi Aziýa ýurtlarynyň we Beýik Britaniýanyň daşary işler ministrleriniň mejlisiniň dowamynda syýasy dialogy, söwda-ykdysady, maýa goýum gatnaşyklaryny çuňlaşdyrmagyň mümkinçiliklerine seredildi.
25-nji fewralda ýurdumyzyň daşary syýasat edarasynda utgaşykly görnüşde Türkmenistan bilen Birleşen Milletler Guramasynyň arasynda durnukly ösüş ulgamynda hyzmatdaşlygyň Çarçuwaly maksatnamasyny durmuşa geçirmek boýunça ýolbaşçy komitetiň nobatdaky mejlisi geçirildi. 2025-nji ýylda bilelikde alnyp barlan işleriň jemlerine bagyşlanan mejlisde hyzmatdaşlygyň 2026-njy ýyldaky ileri tutulýan ugurlary we bilelikdäki iş meýilnamalary ara alnyp maslahatlaşyldy.
Türkmenistanyň BMG-niň Ženewadaky edarasynyň ýanyndaky hemişelik wekiliniň Parlamentara Birleşigiň Baş sekretary Martin Çungong bilen geçiren duşuşygynda ýurdumyzyň bu gurama agza ýurtlaryň parlamentleriniň zenan ýolbaşçylarynyň 16-njy sammitini kabul ediji tarap hökmünde çykyş etmäge taýýardygy tassyklanyldy. Bu forumyň geçirilmegine döwlet Baştutanymyzyň BMG-niň Baş Assambleýasynyň 80-nji sessiýasynyň çäginde öňe süren 2028-nji ýyly “Halkara hukugyň ýyly” diýip yglan etmek baradaky başlangyjyny durmuşa geçirmegiň möhüm tapgyrlarynyň biri hökmünde garalýar.
27-nji fewralda Baku şäherinde geçirilen Türkmenistanyň we Azerbaýjan Respublikasynyň daşary syýasat edaralarynyň arasyndaky geňeşmeleriň dowamynda taraplar ikitaraplaýyn hyzmatdaşlygyň dürli ugurlardaky meselelerini hem-de sebit we halkara gün tertibiniň möhüm ugurlaryny maslahatlaşdylar.
Şeýlelikde, fewral aýynyň dowamynda bolan möhüm wakalara bagyşlanan synda beýan edilen maglumatlar hormatly Prezidentimiziň baştutanlygynda ösüşiň we abadançylygyň ýoly bilen ynamly öňe barýan ýurdumyzyň durmuşynyň dürli çärelere baýdygyny aýdyň görkezýär.