Ýagşygeldi Kakaýew adyndaky Halkara nebit we gaz uniwersitetinde gysga möhletli okuwlary guraýan dürli eýeçilikdäki bilim edaralarynyň okuwçylarynyň arasynda daşary ýurt dilleri boýunça geçirilen döwlet bäsleşiginiň jemleýji tapgyry boldy.

Türkmenistanyň Bilim ministrligi tarapyndan yglan edilen iňlis we rus dilleri boýunça bäsleşik dört ýaş toparynda üç tapgyrda geçirildi. Bäsleşigiň geçirilen ýerlerde, ýagny ýurdumyzyň şäherlerinde we welaýatlarynda açyklygyny we aýdyňlygyny üpjün etmek üçin guramaçylyk komitetleri, eminler topary we gözegçilik toparlary işlediler. Döwlet derejesindäki çäräniň ähli tapgyrlary Merkezi guramaçylyk komitetiniň utgaşdyrmagynda amala aşyryldy.

Aşgabatda geçirilen bäsleşigiň finalyna gatnaşmaga ýurdumyzyň ähli künjeklerinden okuw merkezleriniň iň ökde, ýaş we zehinli diňleýjileriniň 220-den gowragy hukuk gazandy. Jemleýji tapgyr, şeýle hem, öz şägirtlerine goldaw bermek üçin ýygnanan daşary ýurt dili mugallymlaryny, hünärmenlerini we Türkmenistanyň döwlet we hususy okuw merkezleriniň ýolbaşçylarynyň wekillerini birleşdirdi.

Bäsleşigiň jemleri boýunça eminler toparynyň karary bilen 48 gatnaşyjy ýeňiji diýlip yglan edildi. Her ýaş toparynda iňlis we rus dillerini iň gowy bilýänlere bir sany I orun, iki sany II orun we üç sany III orun berildi.

Dabaraly sylaglama çäresiniň dowamynda ýeňijilere Türkmenistanyň Bilim ministrliginiň diplomlary we gymmat bahaly sowgatlar gowşuryldy.

Ýurdumyzyň gysga möhletli okuwlary guraýan bilim edaralarynyň diňleýjileriniň arasynda daşary ýurt dilleri boýunça döwlet bäsleşigi eýýäm dördünji ýyl bäri üstünlikli geçirilip gelinýär we ol okuwçylaryň dil bilimi derejesine baha bermäge mümkinçilik döredýär. Bu çäre iň zehinli ýaşlary ýüze çykarmaga we goldamaga, okuwçylarda özbaşdak işlemek ukyplaryny, döredijilik ukyplaryny ösdürmäge, şeýle hem daşary ýurt dillerini okatmagyň hilini ýokarlandyrmaga we ýaşlaryň arasynda olary öwrenmäge bolan höwesi artdyrmaga ýardam edýär.