Ýurdumyzyň esasy baýlyklarynyň biri bolan uglewodorod serişdelerini gözläp tapmak, senagat taýdan özleşdirmek, olaryň gazylyp alynýan möçberini artdyrmak, çig maly täzeden işlemek we sarp edijilere ýetirmek boýunça giň gerimli işler durmuşa geçirilýär.
Berkarar Diýarymyzda ileri tutulýan ugurlaryň biri bolan nebitgaz pudagynyň mundan bu ýana-da ösmegine, uglewodorod serişdelerinden alynýan, dünýä bazarlarynda islegli harytlaryň öndürilmegine uly goşant goşýan iň iri kärhanalaryň biri-de Lebap welaýatynda ýerleşýän Seýdiniň nebiti gaýtadan işleýän zawodydyr. Geçen ýyllaryň dowamynda bu kuwwatly kärhanada möhüm taslamalaryň ençemesiniň amala aşyrylmagy, düýpli maýa goýum serişdeleriniň hasabyna durkunyň düýpli täzelenmegi bu ýerde önümçiligiň möçberiniň we hiliniň ep-esli ýokarlanmagyna ýardam etdi. Munuň şeýledigine bu ýerde öndürilýän dürli görnüşli ýokary hilli önümler, gazanylýan ýokary netijeler aýdyň şaýatlyk edýär.
Kärhanada 2026-njy – «Garaşsyz, baky Bitarap Türkmenistan – bedew batly at-myradyň mekany» ýylynyň başyndan şu güne çenli nebitiň 96 müň 800 tonnasy gaýtadan işlenilipdir. Bu çig maldan öndürilen önümiň 44 müň 100 tonnasy dürli oktan belgili benziniň bolmagy we olaryň sarp edijilere ugradylmagy aýratyn bellenilmäge mynasypdyr. Bu gymmatly önümi öndürmek boýunça geçen ýylyň şu döwri bilen deňeşdirilende ösüş depgininiň 102,1 göterime deň bolmagy, bu kärhanada önümçiligiň barha kämilleşýändiginiň we işleriň guramaçylykly ýola goýlandygynyň aýdyň mysalydyr. Kärhanada şu ýylyň başyndan bäri dizel ýangyjynyň 24 müň tonnasy öndürilipdir, bu baradaky meýilnama hem artygy bilen amal edilip, önüm öndürmekligiň ösüş depgini-de 105 göterime barabar bolupdyr.
Şeýle hem bu ýerde suwuklandyrylan uglewodorod gazynyň 15,9 müň tonnasynyň öndürilmegi aýratyn bellenilmäge mynasypdyr. Bu geçen ýylyň şu döwri bilen deňeşdirilende 11,5 müň tonna suwuklandyrylan gazyň artyk öndürilendigini, ösüş depgininiň hem 2,6 esse artandygyny aňladýar. Bu ýerde degişli döwürde nebit bitumynyň 4 müň 100 tonnasy öndürilendigini-de aýdyp geçmek bolar. Şeýle ýokary netijeleriň gazanylmagy kärhananyň işçi-hünärmenleriniň öndürijilikli zähmet çekmekleri we kadaly dynç almaklary üçin hormatly Prezidentimiz tarapyndan döredilip berilýän giň şertleriň netijeleridir.
