Türkmenistanda logistika ulgamynda möhüm waka bolup geçdi. Hormatly Prezidentimiz Serdar Berdimuhamedowyň gatnaşmagynda Aşgabat – Türkmenabat ýokary tizlikli awtomobil ýolunyň Mary – Türkmenabat böleginiň açylyş dabarasy geçirildi. Ýoluň işe girizilmegi paýtagtymyzy ýurdumyzyň Gündogar sebiti bilen birleşdirýän ýokary tizlikli awtomobil ýolunyň gurluşygynyň doly tamamlanandygyny alamatlandyrdy.

Döwlet Baştutanymyz dabarada çykyş edip, ýol düzümini döwrebaplaşdyrmagyň Türkmenistanyň strategiýasynyň esasy bölegi bolup durýandygyny nygtady. Ýurdymyz halkara derejesinde möhüm merkeze öwrülip, ulag diplomatiýasyny işjeň ösdürýär.

«Birleşen Milletler Guramasynyň yglan eden Durnukly ulag boýunça onýyllygynyň ilkinji ýylynda şeýle iri taslamalaryň durmuşa geçirilmegi bedew batly ösüşlerimize şaýatlyk edýär. Irki döwürlerde yklymlary birleşdiren Beýik Ýüpek ýolunyň möhüm bölegi ýurdumyzyň üstünden geçipdir. Häzirki döwürde biz bu ýoly döwrebap görnüşinde dikeltmek ugrunda ähli tagallalary edýäris. Aşgabat – Türkmenabat ýokary tizlikli awtomobil ýolunyň gurulmagy hem bu ugurda örän möhüm ähmiýete eýedir» diýip, Türkmenistanyň Prezidenti Serdar Berdimuhamedow belledi.

Ýokary tizlikli awtomobil ýolunyň umumy uzynlygy 600 kilometre deňdir. Taslama tapgyrlaýyn amala aşyryldy, Aşgabat – Tejen we Tejen – Mary bölekleri has ir ulanmaga berildi. Täze ýokary tizlikli awtomobil ýoly alty zolakly bolup, halkara hil we howpsuzlyk ölçeglerine doly laýyk gelýär we Ahal, Mary hem-de Lebap welaýatlarynyň arasynda gönüden-göni baglanyşygy üpjün edýär.

Taslamanyň ýene bir aýratynlygy – onuň içerki telekeçiler tarapyndan durmuşa geçirilmegidir. Gurluşyk işleri Türkmenistanyň Senagatçylar we telekeçiler birleşmesiniň agzalary tarapyndan alnyp baryldy.

Ýokary tizlikli awtomobil ýolunyň işe girizilmegi ýolagçylar we ýük daşaýjylar üçin wagty ep-esli tygşytlamaga, logistika hyzmatlarynyň hilini ýokarlandyrmaga hem-de sebitleriň ykdysady ösüşine güýçli itergi bermäge mümkinçilik döreder. Şeýlelikde, ýurdumyzyň ulag ulgamy döwletleriň we yklymlaryň arasyndaky strategiki merkeziň wezipelerini üpjün edip, has netijeli işlär.