Aşgabat şäherindäki 55-nji orta mekdepde «Soňky jaň» dabarasy mynasybetli geçirilen çäräniň dowamynda Russiýanyň diplomatlary okuw mekdebine 20 sany ekologik guş keteklerini sowgat berdiler. Bu guş ketekleri şol mekdebiň 7-nji synp okuwçysy Öwezmyrat Sapargeldiýewiň taslamasy boýunça taýýarlanyldy.

Ondan öň ýedinji synp okuwçysy öz ýaşaýan sebitiniň töwereginde serçeleriň sanynyň azalýandygyna ünsi beripdi. Biologiýa mugallymy Anna Şamowanyň ýolbaşçylygynda mekdep okuwçysy bu ýagdaý boýunça ylmy-barlag işini geçirdi. Netijede, guşlaryň sanynyň azalmagyna howanyň üýtgemeginiň, iým binýadynyň we höwürtge ýasanmak üçin amatly ýerleriň çäklenmeginiň täsir edýändigi barada netijä geldi. Geçirilen gözegçilikleriň netijeleri boýunça Öwezmyrat «Durnukly howa şertlerde höwürtgelemegi» atly taslamany işläp düzdi.

Bu oýlap tapyşyň düýp manysy guşlar üçin howpsuz we durnukly şertleri üpjün edýän ýörite guş keteklerini döretmekden ybaratdyr. Desgalaryň gurluşygynda içerki temperaturany kadalaşdyrmaga kömek edýän izolýasiýa materiallary (garaharsaň, bede ýa-da penoplast) bolan agaç gatlaklary ulanylýar.

Bu netijeli tehnologiýanyň ulanylmagy serçeler üçin niýetlenen höwürtgeleriň içindäki temperaturany 4,5 gradus peseltmäge mümkinçilik berdi, munuň netijesinde guş çagalarynyň diri galmak ukyby 35 göterim ýokarlandy.

Guş keteklerini gowşurmak dabarasynyň barşynda Russiýa Federasiýasynyň Türkmenistandaky ilçihanasynyň geňeşçi-wekili Aleksandr Wasilýew Russiýanyň Adatdan daşary we Doly ygtyýarly ilçisi Iwan Wolynkiniň ýüzlenmesini okady. Ýüzlenmede, hususan-da, şeýle bellenilýär:

«Biziň duşuşmagymyza siziň mekdebiňiziň okuwçysy Öwezmyrat Sapargeldiýewiň ajaýyp başlangyjynyň sebäp bolmagy meni aýratyn begendirýär. Onuň «Durnukly howa şertlerde höwürtgelemegi» taslamasy Russiýa Federasiýasynyň BMG-niň Ösüş maksatnamasy bilen bilelikde goldaýan «Howa gutujygy» atly başlangyjynyň çäklerinde amala aşyryldy. Köp ýyllaryň dowamynda bu maksatnama Merkezi Aziýadaky mekdep okuwçylaryna we mugallymlaryna howanyň üýtgemegi, ekologiýa we durnukly ösüş meselelerini diňe bir nazaryýetde däl-de, eýsem, anyk hereketler arkaly öwrenmäge kömek edip gelýär».

Diplomatik wekilhananyň ýolbaşçysy Russiýa Federasiýasynyň Türkmenistanyň bilim edaralary bilen hyzmatdaşlyga ýokary baha berýändigini hem-de ekologik bilim, howa gün tertibi we durnukly ösüş ulgamyndaky geljegi uly başlangyçlary yzygiderli goldaýandygyny aýratyn nygtady.

Şuňa meňzeş çäreler ekologik medeniýeti, dostlugy we halkara hyzmatdaşlygy pugtalandyrmaga ýardam edip, ýaşlary bähbitli hem-de peýdaly taslamalary amala aşyrmaga ruhlandyrýar diýip, I.Wolynkin öz ýüzlenmesinde belledi.