Türkmenistanly türgenler Gyrgyz Respublikasynyň Yssyk-köl welaýatynyň Korumdu obasynda alty döwletiň wekilleriniň gatnaşmagynda geçýän Merkezi we Demirgazyk Aziýa çempionatynda bäş medal gazandy.
Guramaçylaryň aýtmagyna görä, ýaryşda Gyrgyzystandan, Gazagystandan, Özbegistandan, Russiýadan, Türkmenistandan we Täjigistandan 8 ýaşdan 20 ýaşa çenli 500-den gowrak ýaş küştçi rapid (tiz görnüşli küşt), adaty «nusgawy» we blis (ýyldyrym çaltlygynda) boýunça medallar ugrunda göreşdiler.
Türkmenistanyň Küşt federasiýasynyň habar bermegine görä, biziň toparymyz dürli ýaş derejesi boýunça 19 küştçüden ybarat boldy.
Ilkinji bolup şweýsar ulgamy boýunça 7 tapgyrda 10 minutlyk wagt gözegçiligi we her göçüm üçin goşmaça 5 sekunt wagt aralygynda geçirilen rapid ýaryşynda küştçülerimiz medallara eýe boldular. Bu görnüşinde türgenlerimiz 2 altyn, 2 kümüş we 1 bürünç medala mynasyp boldular.
Tapgyryň ýeňijileri: ýaş toparynyň iň kiçi, ýagny 8 ýaşdan uly bolmadyk gyzlaryň arasynda Türkmenabat şäherindäki 27-nji orta mekdebiň 3-nji synp okuwçysy Merýem Rüstemowa (2018-nji ýylda doglan, reýting 1585), 10 ýaşdan uly bolmadyk kategoriýada bolsa Lebap welaýatynyň Dänew etrabyndaky 2-nji orta mekdebiň 4-nji synp okuwçysy Bägül Jumaýewa (2017-nji ýylda doglan, reýting 1597). Merýem mümkin bolan 7 utukdan 6-ny gazandy we öz halkara reýtingini 46,8 utuk, Bägül bolsa 6,5 utuk netijesi bilen birinjiligi alyp öz reýtingini 97,2 utuk artdyrdy.
Iki kümüş medaly iň uly ýaş kategoriýasy bolan 20 ýaşly küştçüler eýelediler.
Tapgyrda erkek türgenlerden bu üstünlige Türkmen döwlet bedenterbiýe we sport institutynyň 3-nji ýyl talyby, Aşgabat şäherindäki ýöriteleşdirilen küşt-şaşka mekdebinde tälim alan türgen Annamuhammet Hommadow (reýtingi 2396) eýe boldy. Ol 5 utuk toplap, reýtingini 22,8 utuk ýokarlandyrdy.
Tapgyrda zenan türgenlerden 5 utuk netije bilen Ýagşygeldi Kakaýew adyndaky Halkara nebit we gaz uniwersitetiniň talyby Läle Şöhradowa (reýtingi 2153) kümüş medal gazandy.
Iki kümüş medalyň eýesi hem Serdar Annaberdiýewden tälim alýarlar.
12 ýaşdan uly bolmadyk kategoriýada Türkmenabat şäherindäki 31-nji orta mekdebiň 7-nji synp okuwçysy Aýa Baýramowa (2014-nji ýylda doglan, reýting 1920) bürünç medalynyň eýesi boldy. Ol 5,5 utuk gazanyp reýtingini 39,6 utuk artdyrdy.
Merkezi we Demirgazyk Aziýa – 2026 çempionatyna gatnaşyjylar standart wagt gözegçiliginde geçirilýän nusgawy küşt boýunça ýaryşarlar, jemleýji gününde bolsa blis boýunça tapgyr geçiriler.
