Türkmenistanyň Azyk senagaty assosiasiýasynyň iki sany „Lebap“ we „Baýramaly“ kärhanalarynda durkyny täzelemek we tehniki taýdan enjamlaşdyrmak boýunça uly işlere garaşylýar. Şöhlat önümleriniň, şeýle-de süýt we gatyk önümleriniň, gaýmagyň, peýniriň, mesge ýagynyň dürli görnüşleriniň hasabyna ilata hödürlenýän harytlaryň sany esli köpeler. Taýýar önümi gaplamak boýunça täze häzirkizaman enjamlar ulanylmaga berler.

Türkmenabadyň „Lebap“ kärhanasynyň durkuny täzelemek işleri süýdüň möçberini 4800 tonna çenli, et önümleriniň möçberini bolsa 210 tonna çenli köpeltmäge mümkinçilik berer. „Baýramaly“ kärhanasy bolsa ýylda 6000 tonna süýt we 210 tonna et önümlerini öndürip biler. Bu kärhanalaryň kuwwatlyklary Türkmenistanyň Hormatly Prezidentiniň „Mary welaýatynyň azyk pudagyny ösdürmekligiň esasy ugurlary baradaky we „Lebap“ welaýatynyň azyk pudagyny ösdürmekligiň esasy ugurlary baradaky “ kararlarynyň ýerine ýetirilişiniň çäklerinde artdyrylýar.

Howasyny tämizläp, ýylylyk derejesini gözegçilikde saklaýan häzirkizaman ulgam bilen üpjün edilen önümçilik we kömekçi binalarda täze enjamlar ýerleşdiriler. Mundan başga-da bu ýerde hünärmenleriň işlemekligi we dynç almaklygy üçin amatly jaýlar, abatlaýyş jaýlary, awtoulaglar üçin duralga, energiýa, suw üpjünçiligi, ýangyna garşy howpsuzlyk boýunça desgalar göz öňünde tutulan.

Türkmenistanyň Azyk senagaty assosiasiýasynyň meýilnamasy esasynda Daşoguz welaýatynda maldarçylyk toplumy gurulmaly. Toplumda eti we süýdi gaýtadan işlemeklik üçin önümçilik bölümleri we 500 sany iri şahly mallara niýetlenen ferma hojalygy göz öňünde tutulýar. Toplumyň özi we iýmlik otlary ekmäge niýetlenen meýdanlar 350 ga ýerleşen. Meýdanlary suwarmak işleri damjalaýyn usulda geçirilip, häzirkizaman talaplaryna doly laýyk gelýär.