Daşary ýurt puluna Russiýadan, Birleşen Arap Emirliklerinden, Niderlandlardan, Kiprden, Wirgin adalaryndan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen TS-1 kysymly awiabenzini, gidro usulda arassalanan dizel ýangyjyny, polipropileni satyn aldylar. “A” kysymly tehniki ýod (“Türkmenhimiýa” DK) Birleşen Arap Emirliklerinden gelen işewürleriň geleşikleriniň esasyny düzdi. Mundan başga-da daşary ýurt puluna dürli ölçegdäki tekiz boýalan we žakkard tüýjümek polotensalar, aşgarlanmadyk tüýjümek matalar, nah ýüplükler, egin-eşikler toplumlary, pagta süýümi, agardylan pagta süými, nah ýüplükleriň galyndylary, buýan köki, gara mallaryň we dowarlaryň derileri, dowarlaryň wet-blýu ýarym fabrikatlary satyn alan ýurtlar: Beýik Britaniýa, Hytaý, Russiýa, Türkiýe, Koreýa Respublikasy, Polşa, Serbiýa, Ukraina, Wirgin adalary. Şweýsariýadan gelen işewürler dizel-generator enjamlaryny satyn aldylar. Geleşikleriň umumy bahasy 49 million 139 müň amerikan dollaryndan gowrak boldy.

Depozit manat serişdelerine Beýik Britaniýadan, Türkiýeden, Owganystandan, Gyrgyzystandan, Moldowadan gelen telekeçiler nah ýüplüklerini, garaköli goýnunyň ýuwlan ýüňüni we dokma gyrkyndylaryny satyn aldylar. Geleşikleriň umumy möçberi 4 million 613 müň manada deň boldy.

Içerki bazar üçin ýurdumyzyň telekeçileri 2010-njy ýylyň hasylyndan bugdaýyň 4 million 200 müň manatlygyny satyn aldylar.