Geçen hepde Türkmenistanyň Döwlet haryt-çig mal biržasynyň söwdalarynda geleşikleriň 46-sy hasaba alyndy.

Daşary ýurt walýutasyna Daniýadan, Birleşen Arap Emirliklerinden, Türkiýeden, Owganystandan we Wirgin adalaryndan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen TS-1 belgili awiakerosini, L-0,2-62 belgili dizel ýangyjyny, nebit koksyny, gidroarassalaýyşdan geçirilen dizel ýangyjyny satyn aldylar. “A” belgili tehniki ýody (“Türkmenhimiýa” DK) bolsa Russiýadan gelen telekeçiler aldylar. Mundan başga-da, daşary ýurt walýutasyna dürli ölçegdäki reňkli we tüýjümek žakkard süpürgiçler, reňkli tüýjümek önümler (salfetkalar, süpürgiçler, düşekdaşylar), nah ýüplük, pagta süýümi, ýüň ýüplük, pagta-süým, gara mallaryň we dowarlaryň derileri ýerleşdirildi. Olary satyn alan ýurtlar: Beýik Britaniýa, Şweýsariýa, Birleşen Arap Emirlikleri, Russiýa, Türkiýe, Owganystan, Müsür, Lihtenşteýn, Litwa, Wirgin adalarydyr. Geleşikleriň umumy bahasy ABŞ-nyň 102 million 657 müň dollaryndan gowrak boldy.

Depozit manat serişdelerine Hytaýdan, Russiýadan, Beýik Britaniýadan, Belgiýadan, Hindistandan, Eýrandan, Gankongdan, Gyrgyzystandan gelen telekeçiler dürli ölçegdäki reňkli we tüýjümek žakkard süpürgiçlerini, nah ýüplügi, trikotaž matalary, ýuwulan geçi ýüňini, ýüplügi satyn aldylar. Geleşikleriň jemi 4 million 909 müň manatdan gowrak boldy.

Içerki bazarda ýerli telekeçiler polipropilen we bugdaýyň 2010-njy ýylynyň hasylyndan jemi 396 müň manatlyk satyn aldylar.