Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 55-si hasaba alyndy.

Daşary ýurt walýutasyna Türkiýeden, Malaýziýadan, Owganystandan we Wirgin adalaryndan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen A-80 belgili awtobenzini, suwuklandyrylan gazy, binýatlyk ýagy we ýangyçlyk mazudy satyn aldylar. Wirgin adalaryndan gelen telekeçiler Seýdiniň nebiti gaýtadan işleýän zawodynda öndürilen M-100 belgili mazudy satyn aldylar. Owganystandan gelen täjirler bolsa “Türkmengaz” döwlet konserniniň suwuklandyrylan gazyny, ABŞ-nyň işewür toparlarynyň wekilleri bolsa “Türkmenhimiýa” döwlet konseriniň tehniki uglerodyny satyn aldylar. Mundan başga-da daşary ýurt walýutasyna bugdaý uny, nah ýüplük we mata, agardylan pagta süýümi, gara mallaryň we dowarlaryň derileri, pagta linti we übtügi satyldy. Olary satyn alan ýurtlar: Russiýa, Hytaý, Şweýsariýa, Belgiýa, Türkiýe, Birleşen Arap Emirlikleri, Owganystan, Gyrgyzistan, Wirgin adalarydyr. Geleşikleriň umumy bahasy ABŞ-nyň 127 million 300 müň dollaryndan gowrak boldy.

Depozit manat serişdelerine ABŞ-dan, Awstriýadan, Türkiýeden, Birleşen Arap Emirliklerinden, Ukrainadan, Gyrgyzystandan gelen işewür toparlaryň wekilleri dürli görnüşli dokma önümlerini, pagta ýagyny, nah ýüplügi, tüýjümek matalary, saryja we garaköl goýunlaryň ýüňüni, dokma önümçiliginiň galyndylaryny satyn aldylar. Geleşikleriň umumy bahasy 11 million manada golaý boldy.

Içerki bazarda ýurdumyzyň telekeçileri jemi 1 million 600 müň manatlyk polipropilen we azyklyk bugdaý satyn aldylar.