Geçen hepdede Türkmenistanyň döwlet haryt-çig mal biržasynda geçirilen söwdalaşyklarda geleşikleriň 39-sy hasaba alyndy.

Russiýadan, Beýik Britaniýadan, Owganystandan, Kiprdan we Wirgin adalaryndan gelen işewürler Türkmenbaşydaky nebiti gaýtadan işleýän zawodlar toplumynda öndürilen polipropileni, binýatlyk ýagy, A-80 görnüşli awtoulag benzinini daşary ýurt puluna satyn aldylar. Bulardan başga-da, daşary ýurt pulunyň azyklyk däne, dürli ölçegdäki tekiz boýalan we žakkard tüýjümek polotensalar, pagta süýümi, nah ýüplük, süýümli übtük, distilirlenmedik çig ýag kislotalary ýerlenildi. Olary satyn alan ýurtlar: Russiýa, Beýik Britaniýa, Şweýsariýa, Türkiýe, BAE, Singapur, Lihtenşteýn, Gyrgyzystan, Azerbaýjan. Geleşikleriň umumy bahasy ABŞ-niň 43 million 861 müň dollaryndan geçdi.

Depozit manat serişdeleriniň hasabyna Beýik Britaniýanyň, Türkiýäniň, BAE-niň, Gyrgyzystanyň işewür toparlarynyň wekilleri pagta ýagyny, nah mata we ýüplük, aşgarlanmadyk tüýjümek matalary, dokma önümçiliginiň galyndylaryny satyn aldylar. Geleşikleriň jemi bahasy 2 million 289 müň manatdan gowrak boldy.

Ýurdumyzyň işewürleri içerki bazar üçin azyklyk däne we ýol-gurluşyk tehnikasyny satyn aldylar. Geleşikleriň umumy bahasy 2 million 246 müň manatdan hem geçdi.