Geçen hepdede Türkmenistanyň Döwlet haryt-çig mal biržasynyň söwdalaşyklarynda geleşikleriň 43-si hasaba alyndy.

Daşary ýurt walýutasyna Russiýadan, Turkiýeden we Kiprden gelen telekeçiler degişlilikde Türkmenbaşydaky nebiti gaýtadan işleýän zawodlar toplumynda öndürilen polipropileni, nebit koksyny we uçar kerosinini satyn aldylar. Seýdiniň nebiti gaýtadan işleýän zawodynda öndürilen M-100 kysymyndaky mazut Marşal adalaryndan gelen işewürleriň geleşikleriniň esasy boldy. Mundan başga-da dürli ölçegdäki tekiz reňklenen we tüýjümek polotensalar, nah ýüplük we mata, pagta süýümi, garaköli goýnuň ýüňi, gara mallaryň derileri, mata garyndyly geçiriji çeki, dokma galyndylary (daralanda galan galyndylar) daşary ýurt walýutasyna ýerlenildi. Satyn alan ýurtlar: Russiýa, Beýik Britaniýa, Şweýsariýa, Belgiýa, Türkiýe, Gyrgyzystan. Geleşikleriň umumy bahasy ABŞ-nyň 58 million dollaryna golaý boldy.

Depozit manat serişdelerine Russiýanyň, ABŞ-nyň, Beýik Britaniýanyň, Birleşen Arap Emirlikleriniň, Türkiýäniň, Hindistanyň we Gyrgyzystanyň işewür toparlarynyň wekilleri dürli görnüşdäki taýýar dokma önümlerini, rafinirlenen pagta ýagyny, nah ýüplügi we matany, çig ýüpegi satyn aldylar. Onuň umumy bahasy 12 million manatdan gowrak boldy.

Içerki bazarda ýurdumyzyň telekeçileri umumy möçberi 623 müň manatdan gowrak polipropileni we azyklyk bugdaýy satyn aldylar.