Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 57-si hasaba alyndy.

Daşary ýurt walýutasyna Russiýadan, Birleşen Arap Emirliklerinden we Gibraltardan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen polipropileni, awtoulag benzinini, az kükürtli mazut ýangyjyny, uçar kerosinini, gidroarassalanan dizel ýangyjyny satyn aldylar. Mundan başga-da daşary ýurt puluna dürli ölçeglerdäki tekiz boýalan we jakkard tüýjümek polotensalar, azyklyk bugdaý, nah ýüplükler, pagta toplarynyň gaplary, gara mallaryň we dowarlaryň derileri, buýan köki, agardylan pagta süýümi, pagta süýümi, gara mallaryň ýarym taýýar önümleri, pagta linti, süýmli ulýuk ýerlenildi. Satyn alan ýurtlar: Russiýa, Beýik Britaniýa, Şweýsariýa, Türkiýe, Singapur, Owganystan, Lihtenşteýn, Serbiýa, Ukraina. Geleşikleriň umumy bahasy ABŞ-nyň 167 million 336 müň dollaryna deň boldy.

Depozit manat serişdelerine Hytaýyň, Beýik Britaniýanyň, Birleşen Arap Emirlikleriniň, Awstriýanyň, Türkiýäniň, Slowakiýanyň, Şotlandiýanyň, Gyrgyzystanyň işewür toparlarynyň wekilleri umumy bahasy 29 million 592 müň manada deň bolan jakkard tüýjümek polotensalary we tüýjümek halatlary, arassalanan pagta ýagyny, nah ýüplükleri, aşgarlanmadyk matany, saryja goýnuň we düýäniň ýuwulan ýüňüni, agardylan pagta süýümini, ýüpek çig malyny satyn aldylar.

Ýurdumyzyň telekeçileri içerki bazar üçin umumy bahasy 1 million 13 müň manada deň bolan polipropileni (Türkmenbaşydaky nebiti gaýtadan işleýän zawodlar toplumy), mebelleri, durmuş tehnikasyny, dürli gurluşyk gurallaryny we harytlaryny satyn aldylar.