Geçen hepdede Türkmenistanyň Döwlet haryt-çig mal biržasynyň söwdalaşyklarynda geleşikleriň 26-sy hasaba alyndy.

Daşary ýurt walýutasyna Beýik Britaniýadan, Türkiýeden we Owganystandan, gelen telekeçiler Türkmenbaşynyň nebiti gaýtadan işleýän zawodlar toplumynda öndürilen suwuklandyrylan gazy, uçar kerosinini we nebit koksyny satyn aldylar. Mundan başga hem daşary ýurt walýutasyna dürli ölçeglerdäki tekiz reňlenen we žakkard tüýjümek polotensa, nah ýüplük, dokma galyndylary, pagta süýümi, pagta linti, žinsi galyndylary, çig ýagly kislotalar ýerlenildi. Olary satyn alan ýurtlar Russiýa, Beýik Britaniýa, Belgiýa, Eýran, Lihtenşteýin boldy. Geleşikleriň umumy bahasy ABŞ-nyň 32 million 581 müň dollaryndan gowrak boldy.

Depozit manat serişdelerine Russiýanyň, Beýik Britaniýanyň, Awstriýanyň, BAE-niň, Türkiýäniň, Ukrainanyň, Gyrgyzystanyň işewür, toparlarynyň wekilleri aşgarlanan matany, nah ýüplügi, garaköli goýnuň ýuwlan ýüňüni we ýuwlan geçi çöpürini satyn aldylar. Olaryň umumy bahasy 18 million 436 müň manatdan gowrak boldy.