Geçen hepdede Türkmenistanyň Döwlet haryt-çig mal biržasynyň söwdalaşyklarynda geleşikleriň 43-si hasaba alyndy.

Daşary ýurt puluna, Beýik Britaniýadan, Birleşen Arap Emirliklerinden Owganystandan we Yrakdan gelen telekeçiler Türkmenbaşynyň nebiti gaýtadan işleýän zawodlar toplumynda öndürilen suwuklandyrylan gazy we yşyklandyryş kerosinini, awtomobil benzinini, dizel ýangyjyny satyn aldylar. Owganystandan gelen işewürler “Türkmengaz” döwlet konserniniň suwuklandyrylan gazyny hem satyn aldylar. Mundan başga-da, dürli ölçegdäki tekiz boýalan we žakkard tüýjümek polotensa, aşgarlanan tüýjümek mata, nah ýüplük, agardylan pagta süýümi, pagta übtügi we linti hem-de başga önümler ýerlenildi. Olary satyn alan ýurtlar: Beýik Britaniýa, Hytaý, Russiýa, Şweýsariýa, BAE, Türkiýe, Lihtenşteýn, Azerbaýjan. Geleşikleriň umumy bahasy ABŞ-nyň 114 million 104 müň dollaryndan gowrak boldy.

Depozit manat serişdelerine ABŞ-nyň, Russiýanyň, Beýik Britaniýanyň, BAE-niň, Türkiýäniň, Ukrainanyň we Gyrgyzystanyň işewür toparlarynyň wekilleri gaplanan pagta we günebakar ýagyny, süýji-köke önümlerini, dürli görnüşdäki trikotaž we tüýjümek önümleri, nah ýüplügi, ýuwlan geçi çöpürini satyn aldylar. Olaryň umumy bahasy 5 million 742 müň manatdan gowrak boldy.

Içerki bazar üçin ýurdumyzyň telekeçileri umumy bahasy 64 müň manatdan gowrak bolan gurluşyk tehnikasyny satyn aldylar.