Geçen hepdede Türkmenistanyň döwlet haryt çig mal biržasynda geçirilen söwdalarda geleşikleriň 41-si hasaba alyndy.

Daşary ýurt puluna Russiýadan we Beýik Britaniýadan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen yşyklandyryş kerosini, polipropileni, kükürdi az ýangyç mazutyny satyn aldylar. Täjigistandan galan işewürler “Türkmengaz” döwlet konserniniň suwuklandyrylan gazyny satyn aldylar, “Türkmenhimiýa” döwlet konserniniň tehniki ýody Gonkongyň işewür toparlarynyň wekilleriniň seçip alan önümi boldy. Mundan başga-da, daşary ýurt puluna tekiz boýalan we žakkarda tüýjümek önümler, nah ýüplük, pagta süýümi, ulýuk, pagtany gaýtadan işleýän senagatyň galyndylary ýerlenildi. Olary satyn alan ýurtlar: Russiýa, Beýik Britaniýa, Şweýsariýa, Türkiýe, Birleşen Arap Emirlikleri, Singapur, Lihtenşteýin, Azerbaýjandyr. Baglaşylan geleşikleriň umumy möçberi ABŞ-niň 99 million 300 müň dollaryndan ýokary geçdi.

Depozit manat serişdelerine Russiýadan, Beýik Britaniýadan, Awstriýadan, Türkiýeden, BAE-den we Gyrgyzystandan gelen telekeçiler dokma önümlerini, pagta ýagyny, nah matany we ýüplügi, saryja goýnunyň ýüňüni, pagta şrotyny satyn aldylar. Olaryň uly möçberi 12 million manatdan gowrak boldy.

Içerki bazar üçin ýurdumyzyň telekeçileri azyklyk bugdaýy satyn aldylar. Onuň möçberi 342 müň manatdan ýokary geçdi.