Geçen hepdede Türkmenistanyň döwlet haryt-çig mal biržasynda geçirilen söwdalarda geleşikleriň 32-si baglaşyldy

Daşary ýurt puluna Russiýadan we Owganystandan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen polipropileni, dizel ýangyjyny, awtomibil benzini, gidrousulda arassalanan dizel ýangyjyny satyn aldylar. Mundan başga hem daşary ýurt puluna pagta süýümi, buýan köküniň gury ekstrakty, daralan ýüň, çig ýagly kislota ýerlenildi. Olary satyn alan ýurtlar: Hytaý, Beýik Britaniýa, Şweýsariýa, Türkiýe, Birleşen Arap Emirlikleri, Belgiýa, Lihtenşteýn. Baglaşylan geleşikleriň jemi möçberi ABŞ-nyň 67 million 561 müň dollaryndan gowrak boldy.

Depozit manat serişdelerine Beýik Britaniýanyň, Şweýsariýanyň, Birleşen Arap Emirlikleriniň, Türkiýäniň, Şotlandiýanyň, Gyrgyzystanyň işewür toparlarynyň wekilleri nah matany, garaköli goýnuň ýuwlan ýüňüni, pagta şrotyny satyn aldylar. Geleşikleriň umumy möçberi 9 million 205 müň manatdan gowrak boldy.

Içerki bazarda ýurdumyzyň telekeçileri azyklyk bugdaýy we aşgarlanan biz matany satyn aldylar. Geleşikleriň umumy möçberi 625 müň manatdan gowrak boldy.