Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 44-si hasaba alyndy.

Daşary ýurt walýutasyna Birleşen Arap Emirliklerinden we Owganystandan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen awtobenzini, suwuklandyrylan gazy, dizel ýangyjyny, ýakylýan mazudy satyn aldylar. Beýik Britaniýadan gelen telekeçiler Seýdiniň nebiti gaýtadan işleýän zawodynyň göni arassalanan benzinini satyn aldylar. Bulardan başga-da, daşary ýurt puluna tekiz reňklenen žakkard tüýjümek önümler, nah ýüplügini, pagta süýümi, pagta lintini, dürli görnüşdäki pileleri ýerleşdirildi. Satyn alan ýurtlur: Russiýa, Beýik Britaniýa, Şweýsariýa, Türkiýe, Kipr, Ukraina, Gyrgyzystan. Geleşikleriň umumy bahasy ABŞ-nyň 171 million 280 müň dollaryna golaý boldy.

Depozit manat serişdelerine Beýik Britaniýanyň, Russiýanyň, Türkiýäniň, we Gyrgyzystanyň işewür toparlarynyň wekilleri umumy bahasy 10 million 630 müň manatlyk trikotaž önümlerini, tikinçilikde ulanylýan nah pagtany, nah ýüplügi, arassalanan günebakar ýagyny, nah ýüplügiň galyndylaryny, agardylan pagta ýüplügini, şeýle hem ýük awtoulagyny satyn aldylar.

Ýurdumyzyň telekeçileri içerki bazar üçin umumy bahasy 383 müň manatlykdan gowrak bolan polipropileni satyn aldylar.