Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 35-si hasaba alyndy.

Daşary ýurt walýutasyna Russiýadan, Beýik Britaniýadan, Germaniýadan, Birleşen Arap Emirliklerinden, Niderlandlardan, Owganystandan we beýleki ýurtlardan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen awiokerosinini, gidroarassalanan dizel ýangyjyny, polipropileni we dizel ýangyjyny satyn aldylar. Beýik Britaniýadan gelen işewürler toparynyň wekilleri bolsa Seýdiniň nebiti gaýtadan işleýän zawodynda öndürilen göniarassalanan benzini satyn aldylar. Bulardan başga-da daşary ýurt walýutasyna nah ýüplük, buýan köki, pagta-süýümi ýerlenildi. Satyn alan ýurtlar: Beýik Britaniýa, Şweýsariýa, Birleşen Arap Emirlikleri, Türkiýe, Serbiýa. Geleşikleriň umumy bahasy ABŞ-nyň 157 million 300 müň dollaryndan gowrak boldy.

Depozit manat serişdelerine Beýik Britaniýadan, Şweýsariýadan, Birleşen Arap Emirliklerinden, Türkiýeden we Gyrgyzystandan gelen telekeçiler jemi 5 million manatlyga golaý nah ýüplügi, garaköli we saryja goýunlaryň ýüňüni, brezent matasyny satyn aldylar.

Ýurdumyzyň telekeçileri içerki bazar üçin umumy bahasy 190 müň manatlykdan gowrak möçberde azyklyk bugdaýy, polipropileni we maýdalanan polimerleri satyn aldylar.