Ýurtda 860 müň gektar meýdana güýzlük bugdaý ekildi. Daýhanlar bu meýdandan 1 million 600 müň tonna bugdaý ýygnamagy göz öňünde tutýarlar. Şu günler ýurduň bugdaý ekilen meýdanlarynda ekinlere ideg etmek işleri giňden ýaýbaňlandyryldy.

Maýsalaryň çalt boý almagyna we ösmegine gönükdirilen toplumlaýyn çäreler dowam etdirilýär. Ekin meýdanlarynda topragy mineral we organiki dökünler iýmitlendirmek, haşal otlara garşy göreş, ösüş suwuny tutmak işleri alnyp barylýar. Umuman, ekin meýdanlarynda pürküji, tirkeg we beýleki kömekçi tehnikalar dakylan traktorlaryň müňden gowragy iuşleýär.

Ekiş möwsümi geçen ýylyň oktaýbr aýynyň ahyrynda tamamlandy. Onuň döwamynda 198 müň tonnadan gowrak bugdaý tohumy ekildi. Bugdaý tohumynyň dürli sebitlerde ösdürilip ýetişdirilýän ýumşak görnüşleriniň 16-sy we gaty görnüşleri ekildi. Bugdaýyň däp boýunça ösdürilip ýetişdirilýän görnüşlerinden “Sähraýy”, “Ýolöten-1”, “Bitarap”, “Juwan”, “Türkmenbaşy-1”, “Ýolöten-3”, “Batko”, “Ýubileýnaýa-100” we beýlekileri görkezmek bolar. Bugdaýyň bu görnüşleri howanyň pes temperaturasyna durnukly, çalt ýetişýändigi, ýokary hasyllylygy we ýokry hilliligi, kesele garşy durnuklylygy bilen tapawutlanýar.

Ýurtda ösdürilip ýetişdirilýän bugdaýyň “Miras” we “Akbaş” görnüşleri geçen ýyl ekildi. Stawropolyň indi ikinji ýyl ekilýän “Nota”, “Irişka” we “Wassa” ýaly görnüşleri ýerli toprak-howa şertlerine gowy uýgunlaşdylar. Şu ýyl Russiýanyň “Krupinka” gaty görnüşli bugdaý tohumy bugdaý tohumlarynyň üstüni ýetirer. Ol Ahal we Mary welaýatlarynda ekildi.

Bugdaý Ahal welaýatynda 225 müň gektara, Mary welaýatynda 200 müň gektar meýdana, Daşoguz welaýatynda 180 müň gektar meýdana, Lebap welaýatynda 175 müň gektar meýdana, Balkan welaýatynda 80 müň gektar meýdana ekildi.