Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 53-si hasaba alyndy.

Daşary ýurt walýutasyna Russiýadan, Birleşen Arap Emirliklerinden, Niderlandlardan, Owganystandan we Täjigistandan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen polipropileni, suwuklandyrylan gazy, awiokerosinini satyn aldylar. Bulardan başga-da, Owganystandan gelen täjirler suwuklandyrylan gazy (Türkmengaz DK) satyn aldylar. Daşary ýurt walýutasyna nah ýüplük, pagta süýümi ýerlenildi. Satyn alan ýurtlar: Beýik Britaniýa, Şweýsariýa, Birleşen Arap Emirlikleri, Türkiýe, Koreýa Respublikasy, Singapur we beýlekiler. Geleşikleriň umumy bahasy ABŞ-nyň 51 million 735 müň dollaryndan gowrak boldy.

Depozit manat serişdelerine Russiýadan, Hytaýdan, Türkiýeden, Owganystandan we Ukrainadan gelen telekeçiler jemi 10 million 644 müň manatlykdan gowrak arassalanan pagta we günebakar ýagyny, nah ýüplügi, regenerirlenen süýümi satyn aldylar.

Ýurdumyzyň telekeçileri içerki bazar üçin azyklyk bugdaýy 2 million manatlykdan gowrak möçberde satyn aldylar.