Ýakynda Moskwada “Detallarda hil we howpsuzlyk” ady bilen SGS VIII Azyk maslahaty geçirildi. Oňa Russiýanyň we öňki soýuz respublikalarynyň giňişliklerinden häkimiýet we jemgyýetçilik guramalarynyň, azyk senagatynyň we oba hojalyk telekeçiliginiň, söwda, jemgyýetçilik iýmiti ulgamynyň we logistiki böleginiň dürli pudaklarynyň wekilleri gatnaşdylar. Hünärmenleriň maslahaty çekeleşikli ýagdaýda geçip, onda esasy üns azyk pudagynyň önümleriniň hiline we durnukly ösüşine berildi. Iki ýüz töweregi hünärmenleriň gatnaşan bu maslahata biziň ýurdumyzdan “Netijelilik” HJ wekilleri gatnaşdylar.

SGS inspeksion hyzmatlarda, ekspertizada, synaglarda we sertifikasiýalaşdyrmakda dünýäde öňdebaryjy gurama bolup durýar. Duşuşyk tematiki mejlisleriň 8 görnüşi boýunça geçirilip, olar azyk howpsuzlygyny we önümçiligiň hilini dolandyrmak meselelerine bagyşlandy. Hususan-da, maslahata gatnaşyjylar harytlara nyşan goýmak ulgamynyň möhüm täzelikleri, logistikany dolandyrmak, netijeli menejment ulgamyny düzmek, ISO standartynyň täze wersiýasy, töwekgelçilikleri dolandyrmak, sanitar praktikalary bilen tanyşdyryldy.

“Netijelilik” HJ işi azyklyk önümlerini öndürýän kärhanalaryň 22-ne maglumat we maslahat bermek boýunça ýardam bermek bilen baglanşyklydyr. Olaryň hatarynda ýurduň hem Senagatçylar we telekeçiler birleşmesiniň agzalary, hem Söwda we daşary ykdysady gatnaşyklar hem-de Oba we suw hojalygy ministrlikleriniň düzümine girýän kärhanalar bar.

Ýurduň kärhanalarynyň onlarçasy ISO 9001, HACCP, FSSC 22000 halkara we beýleki standartlaryna laýyklykda işleýärler. Hili dolandyrmak we azyk önümçiliginiň howpsuzlygyny dolandyrmak ulgamlarynyň ösdürilmegi, dünýäde gazanylan iň gowy tejribeleri ulanmak – Aziada-2017-ä taýýarlyk görmegiň we ýurduň azyk senagatynyň önümleriniň eksport mümkinçiligini ýokarlandyrmagyň möhüm meseleleriniň biri bolup durýar.