Türkmenistanly türgenler Samarkantda tamamlanan ýeňil atletika boýunça Merkezi Aziýanyň IV açyk çempionatynda jemi 11 – üç altyn, bäş kümüş we üç bürünç medal eýelediler. Ýaryşy Özbegistanyň Sporty ösdüriş ministrligi, Milli olimpiýa komiteti we Ýeňil atletika federasiýasy Merkezi Aziýanyň Ýeňil atlerika assosiasiýasynyň we «Uzbekneftegaz» PJ-niň goldamagynda guradylar.

Ýaryşa gatnaşan 300-den gowrak türgen iki günüň dowamynda ýeňil atletika ugurlarynyň 41-sinde medallaryň 59 toplumy ugrunda bäsleşdiler.

Türkmenistanyň toparyndan Walentina Meredowa 100 metre ylgamakda (12,12 sekunt), Mergen Mämmedow ýekedaban zyňmakda (69,10 m) we Maksat Mämmedow ýadro zyňmakda (16,08 m) altyn medala mynasyp boldular. Maksat Mämmedow disk zyňmakda 52,41 m netije bilen kümüş medal hem eýeledi.

Şeýle hem erkekler we zenanlar toparymyz 4х100 metr hem-de 4х400 metr aralyga estafetada kümüş medallaryň ikisini eýelediler. Birinji estafetada erkekler 42,70 sekunt, ikinjide – 3 minut 19,93 sekunt netije görkezdiler. Zenanlar degişlilikde – 49,23 sekunt we 4 minut 05,60 sekunt netije görkezdiler.

Jennet Muhamowa naýza zyňmakda (49,89 m), Alişer Sadullaýew 100 metre ylgamakda (10,80 sekunt) we Bagrat Gasanbekow uzynlyga bökmekde (7,60 m) bürünç medala mynasyp boldular.