Paýtagtymyzdaky Döwletliler köşgünde terbiýelenýän çagalar Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň goldaw bermeginde Türkiýe Respublikasynda boldular. Olar Türkiýede her ýylyň 23-nji aprelinde bellenilýän Milli özygtyýarlylyk we çagalar güni mynasybetli geçirilen medeni çärelere gatnaşdylar.
Türki Döwletleriň Guramasynyň Aksakgallar geňeşi tarapyndan taýýarlanylan medeni maksatnama laýyklykda, Döwletliler köşgünde terbiýelenýän çagalar doganlyk ýurduň Ankara we Stambul şäherlerinde geçirilen çärelere gatnaşdylar. Türkiýede guralan dabaraly çärelere gatnaşyjylaryň arasynda Türki Döwletleriň Guramasyna agza we synçy döwletlerden gelen çagalaryň bardygyny bellemek gerek.
Döwletliler köşgünde terbiýelenýän çagalar medeni maksatnamanyň çäklerinde Mustafa Kemal Ata Türküň aramgähine baryp gördüler. Türkiýäniň Beýik millet mejlisine baryp görmekleri we bu ýerde mähirli kabul edilip, doganlyk ýurduň parlamentiniň işiniň aýratynlyklary bilen tanyşmaklary olarda ýatdan çykmajak täsirleri galdyrdy.
Aşgabadyň Döwletliler köşgünde terbiýelenýän çagalary Türkiýe Respublikasynyň Prezidenti Rejep Taýyp Ärdogan kabul etdi. Olar türk topragynda mähirli kabul edilendikleri, çäreleriň ýokary guramaçylyk derejesiniň üpjün edilendigi üçin doganlyk ýurduň Liderine tüýs ýürekden hoşallyklaryny bildirdiler.
Çagalaryň türk dilinde okan goşgulary we çuňňur hoşallygyň nyşany hökmünde hormatly Prezidentimiziň “Ýaşlar — Watanyň daýanjy” atly kitabynyň türk diline terjime edilen nusgasynyň Türkiýäniň Prezidentine sowgat berilmegi tolgundyryjy pursatlara öwrüldi. Aýratyn-da, Türkiýe Respublikasynyň Baştutany halkymyzyň milli gymmatlyklary bolan türkmen tahýasyny we dutary özüne bildirilen hormatyň nyşany hökmünde kabul edýändigini nygtap, munuň üçin türkmen çagalaryna hem-de olaryň üsti bilen Gahryman Arkadagymyza, hormatly Prezidentimize, doganlyk türkmen halkyna tüýs ýürekden hoşallyk bildirdi.
Ýeri gelende aýtsak, Milli Liderimiziň başyny başlan beýik işleriniň hormatly Prezidentimiziň baştutanlygynda üstünlikli amala aşyrylmagy esasynda, ösüp gelýän ýaş nesiller, olaryň saglygy, sazlaşykly ösüşi bilen baglanyşykly meseleler döwletimiziň hemişelik üns merkezinde saklanýar.
Mälim bolşy ýaly, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy çagalaryň saglygynyň berkidilmegine gönükdirilen köp sanly ynsanperwer işleri amala aşyrdy. Gaznanyň hasabyna näsag çagalaryň köpüsine çylşyrymly operasiýalar geçirilip, olaryň saglyklary dikeldildi. Şeýle hem bu düzüm tarapyndan dünýäniň birnäçe ýurtlarynda heläkçilik zerarly ejir çeken çagalara ynsanperwerlik ýükleri ugradyldy. Munuň özi türkmen halkyna mahsus asylly ýörelgeleriň häzirki döwrüň ruhuna kybap derejede ösdürilýändiginiň güwäsidir. Ýurdumyzda çagalaryň saglygyny berkitmek, olaryň wagtyny şadyýan we gyzykly geçirmekleri ugrunda ähli mümkinçilikler döredilýär. Bu bolsa Gahryman Arkadagymyzyň asylly başlangyçlarynyň rowaçlyklara beslenýändigini görkezýär.
Türkiýede giňden bellenilýän Milli özygtyýarlylyk we çagalar güni mynasybetli guralan çäreleriň maksady doganlyk halkyň milli medeniýetini wagyz etmekden, Türki Döwletleriň Guramasyna agza hem-de synçy ýurtlaryň däp-dessurlary bilen tanyşmakdan, degişli ugurlar boýunça tejribe alşylmagyny ýola goýmakdan ybarat boldy.
Döwletliler köşgünde terbiýelenýän çagalar doganlyk ýurtda bolup, türki halklaryň milli medeniýeti bilen ýakyndan tanyşmaga, özara tejribe alyşmaga döwlet derejesinde üns berilýändigi üçin Gahryman Arkadagymyza hem-de Arkadagly Gahryman Serdarymyza çaga kalplaryndan çykýan çuňňur hoşallyklaryny beýan etdiler. Olar döredilýän mümkinçiliklerden netijeli peýdalanyp, Watanymyzyň sazlaşykly ösüşine mynasyp goşant goşýan ýaşlar bolup ýetişjekdiklerine ynandyrdylar.
