Magtymguly adyndaky milli sazly drama teatrynda Tahyr Ataýewiň orkestriniň sazandalyk etmeginde «Buratinonyň başdan geçirenleri» atly ertekiniň sazly sahna oýny boldy. Oýny alypbaryjy Sona Öwezmyradowa, Papa Karlonyň adaty bir agaçdan ýasan Buratino atly oglanjygynyň başdan geçirmeleri hakda erteki okap başlady. Buratino bilen bilelikde ajaýyp başdan geçirmeleriň beýleki gahrymanlary hem tomaşaçylaryň öňünde peýda bolup ugrady.

Alekseý Tolstoýyň «Altyn açarjyk ýa-da Buratinonyň başdan geçirenleri» atly ertekisi sahnada janlandy. Bu sahna oýna Karabas-Barabasyň, Bazilio atly pişigiň, Alisa atly tilkiniň, Tortilla atly pyşdylyň we Duremaryň keşplerini ýerine ýetiren aktýorlar bilen birlikde çagalar hem gatnaşdy. Buratinonyň keşbini «Buratinonyň başdan geçirenleri» filminiň baş gahrymanyna gaty meňzeş Selim Ataýew ýerine ýetirdi.

Şatlykly, käwagt howply, ýöne örän sazly erteki aglabasy oglan-gyzlar bolan tomaşaçylaryň ünsüni özüne çekdi. Şadyýan Buratino, şeýle hem onuň wepaly dostlary – Malwina, Pýero, Artemon – ajaýyp gurjak teatrynyň gizlin gapysyny açýan altyn açarjygyň syryny bildiler.

– Sahnada garagol, ýöne diýseň ýakymly agaç oglanjyk hakda sazly ertekini janlandyrmak pikiri, Alekseý Rybnikowyň «Buratinonyň başdan geçirenleri» çeper filmi üçin ýazan ajaýyp sazyndan gelip çykdy – diýip, dirižýor Tahyr Ataýew gürrüň berýär. – Orkestrimiziň sazandalary meniň teklibimi begenç bilen goldadylar. Indi iş kiçijek artistlere galypdy. Munda çagalar teatr studiýasynyň režissýory Tatýana Öwezmyradowa kömek etdi.

– Buratinonyň keşbini janlandyrjakdygymy eşidenimde, özümi bagtly duýdum, – diýip, Buratinonyň keşbini ýerine ýetiriji Selim Ataýew söhbetdeşlikde aýtdy. – Bu meniň iň gowy görýän erteki gahrymanym. Men onuň batyrlygyny, ugurtapyjylygyny we hoşniýetliligini halaýaryn. Ol adamlara begenç bagyş etmek üçin ýaradylandygyna tüýs ýürekden ynanýar.

Tomaşaçy çagalar hem Buratinonyň başdan geçirenlerine tomaşa etmekden lezzet aldylar. Iň soňky aýdymda bolsa: «Çagalar, meniň adym näme?» diýen soraga tomaşaçylar bir agyzdan: «Bu-ra-ti-no!» diýip jogap berdiler.