Türkmen halkynyň umumadamzat medeniýetinň genji-hazynasyna goşan milli gymmatlyklarynyň biri hem türkmen alabaýlarydyr. Berkarar döwletiň täze eýýamynyň Galkynyşy döwründe milli mirasymyzy, şol sanda türkmen alabaýlaryny öwrenmek, olaryň arassa ganlylygyny saklamak, köpeltmek hem-de nesillere geçirmek, şan-şöhratyny dünýä çykarmak boýunça tutumly işler amala aşyrylýar.
Ýurdumyzda Halkara «Türkmen alabaý itleri» assosiasiýasynyň döredilmegi, şeýle hem onuň welaýatlarda döwrebap merkezleriniň gurlup, ulanylmaga berilmegi, her ýyl oktýabr aýynyň soňky ýekşenbesinde Türkmen alabaýynyň baýramynyň halkara derejesinde giňden bellenilmegi ýokarda aýdylanlaryň aýdyň mysalydyr. Häzirki wagtda türkmen alabaýlarynyň akyllylygyny, saklygyny, wepadarlygyny, merdemligini açyp görkezýän hem-de türkmen alabaýlarynyň baýramyny has-da dabaralandyrmak maksady bilen dürli çärelere giň gerim berilmegi-de milli mirasymyza goýulýan belent sarpanyň ýüze çykmasydyr.
Lebap welaýatynyň Taryhy we ülkäni öwreniş muzeýiniň, Lebap welaýat ýörite sungat mekdebiniň hem-de Türkmenistanyň Magtymguly adyndaky Ýaşlar guramasynyň Türkmenabat şäher Geňeşiniň bilelikde guramaklarynda surat çekmek boýunça «Türkmen alabaýy — milli mirasymyz we buýsanjymyz» ady bilen geçirilen döredijilik bäsleşigi we «Waspy dünýäni jadylan türkmen alabaýy» atly sergi Türkmen alabaýynyň baýramyna mynasyp sowgat boldy. Welaýatyň medeniýet we bilim ulgamlarynyň, jemgyýetçilik guramalarynyň, Lebap welaýat ýörite sungat mekdebiniň mugallymlarynyň we talyp ýaşlarynyň gatnaşmaklarynda geçirilen serginiň açylyş dabarasy täsirliligi bilen tapawutlandy.
Bu ýerde ýurdumyzda ata-babalarymyzyň asyrlaryň dowamynda döreden milli mirasy, türkmen alabaýlary, häzirki wagtda Gahryman Arkadagymyzyň hem-de Arkadagly Gahryman Serdarymyzyň bimöçber tagallalary bilen ýurdumyzda itşynaslyk sungatynyň kämilleşdirilişi, türkmen alabaýlarynyň ajaýyp sypatlary baradaky çuňňur mazmunly çykyşlar ünsli diňlenildi. Soňra bu ýere ýygnananlar türkmen alabaýlaryna bagyşlanan sergini synladylar. Türkmen alabaý itleriniň aýratynlygyny görkezýän merdemsi keşbini, eýesine wepalylyk sypatlaryny açýan surat we grafika eserleri dabara gatnaşyjylarda ýatdan çykmajak täsirler galdyrdy.
Soňra eminler topary sergide ýerleşdirilen suratlar boýunça bäsleşigiň ýeňijilerini kesgitlediler. Netijede, welaýat ýörite sungat mekdebiniň nakgaş bölüminiň 4-nji we 2-nji ýyl talyplary Adylhan Şeripow «Sähra alabaýa dogduk depedir» hem-de Jennet Kuwatgeldiýewa «Alabaý» atly eserleri bilen birinji, şol bölümiň 2-nji we 4-nji ýyl talyplary Aýna Rejepowa «Alabaý» atly işi bilen hem-de Aýjemal Şerbaýewa «Alabaý — Amyderýanyň ýaraşygy» diýen eseri bilen ikinji, bölümiň 4-nji we 2-nji ýyl talyplary Bägül Bazarowa «Wepadarlyk nusgasy» hem-de Gözel Hojaniýazowa «Wepaly alabaýym» atly işleri bilen degişlilikde üçünji orna, şeýle hem ýadygärlik sowgatlaryna hem-de Hormat hatlaryna mynasyp boldular.
