Fransiýanyň Aşgabatdaky ilçihanasynyň ýanyndaky Fransuz institutynda şatlykly fleşmob çäresi geçirildi. Bu ýyl bu halkara çärä 130 ýurt gatnaşýar, şolaryň biri-de biziň ýurdumyzdyr.

Fleşmoby esaslandyryjy fransuz suratkeşi Žoel Gontýe islegi bolan ähli adamy ýylda iki gezek belli bir mowzukda surat sergisini guramaga çagyrdy. Munda gatnaşyjynyň ýaşy we surat çekmek başarnygy möhüm däl. Şol gün her kim özüni suratkeş ýaly duýmaly. Bu çäre halkyň göwnüni awlady we kem-kemden beýleki ýurtlara-da ýaýrap, halkara derejesine eýe boldy.

2025-nji ýyldaky çäre «Gündiz. Gije. Ýagtylygy serpikdirip» diýen temadan bolar. «Uly kir ýuwuşlyk» adyna laýyklykda, suratlar sergilerdäki ýaly, çarçuwalara salynmaýar ýa-da diwarlardan asylmaýar. Fransuz institutynyň howlusynda birnäçe ýüp çekilipdir we fleşmoba gatnaşýanlaryň işleri adaty geýim gysgyçlary bilen şol ýüplerden asylýar. Gatnaşýanlaryň we işleriň sany hasaba alynmaýar, ýöne iň işjeň gatnaşanlaryň Fransuz institutynyň, «MLF» fransuz mekdebiniň we Bäşim Nuraly adyndaky çagalar çeperçilik mekdebiniň okuwçylarydygy bellendi.

Ýeri gelende aýtsak, Çagalar çeperçilik mekdebiniň müdiri Öwezgeldi Ýagmyrow okuwçylarynyň adyndan Fransuz institutyna 10 sany natýurmort suratlary sowgat berdi. Olaryň biri çärä gatnaşýanlara has-da ýarady. Onda Bäşim Nuraly adyndaky çeperçilik mekdebiň okuwçysy bir tabakda iki sany bişen nary we bir tahýany suratlandyrypdyr. Biri-biri bilen utgaşmaýan ýaly görünýän bu şekil bu narlaryň güneşli Türkmenistanda ösdürilip ýetişdirilendigini görkezýär.

Sergide şekillendirişiň reňk , galam we akwarel bilen çekmek ýaly köp ugry görkezildi. Çagalaryň käbiri işlerinde kollaž ulanypdyr. Birnäçe surat täze uslypda – wizual şygryýetde ýerine ýetirilipdir. Bu suratlary şekillendirmek üçin sözler ulanylypdyr.

Iň gyzykly eserleriň arasynda Aşgabat şäherindäki 15-nji orta mekdebiň okuwçysy Sähra Orazowanyň «Şapak» atly suraty-da bar. «Gündiz» we «Gije» mowzuklaryny saýlap, Sähra sepgitde saklanypdyr we owadan gülgüne bir görnüşi suratlandyrypdyr.

Surat çekmek boýunça sapak alyp-almandygy soralanda, gyzjagaz ozal suratkeş bolmak isländigini we az-kem sapak alandygyny, ýöne soňra fransuz dilini öwrenmek höwesiniň özüne çekendigini aýtdy. Şeýle-de bolsa, işine seretseň, beýan etme ussatlygy we surat çekmek endigi ýitip gitmändir.

Fleşmob ýylda iki gezek geçirilýär. Bu gyzykly waka çagalaryň göwnünden turdy, şonuň üçin-de ol dowam etse gerek.