Halkara startap forumynyň çäklerinde geçirilen panel çekişmesi sebitdäki IT-telekeçiligiň geljegini ara alyp maslahatlaşmak üçin ähmiýetli waka boldy.

Türkmenistandan we Merkezi Aziýadan gelen bilermenler hereketli we üstünlikli startap ekoulgamyny kemala getirmek üçin örän möhüm bolan meselelere ünsi jemlediler. Hususan-da, işewürlik üçin hukuk çarçuwalary we kadalaşdyryjy höweslendirmeler, tehnologiýa ulgamynda başarnyklary ösdürmek we zehinleri saklamak, irki tapgyrdaky startaplar üçin maýa goýumlaryna elýeterliligi öwrenmek, şeýle hem döwlet we hususy wençur gaznalary üçin amatly modelleri döretmek ýaly soraglar ara alnyp maslahatlaşyldy.

Çekişmäniň ruhlandyryjy pursatlarynyň biri «KinesteX» startapynyň esaslandyryjysy Perman Annamämmedowyň çykyşy boldy. 24 ýaşly Perman eýýäm startapyny durmuşa geçirmekde üstünlikli tejribä eýedir. Onuň taryhy Türkmenistanyň ýaş zehinleriniň mümkinçiliklerini aýdyň görkezýär.

Ol höwesjeňler topary bilen bilelikde çalt emeli aňy (AI) ulanýan innowasion fitnes programmasyny işläp düzdi. Taslamanyň esasy maksady yzygiderli sport bilen meşgullanmak isleýän adamlara sagdyn bolmaga kömek etmekdir.

Permanyň belleýşi ýaly, olar şahsy tälimçiniň bir görnüşi bolan «AI» kömekçisini döretdiler. Bu programma diňe bir kaloriýalary hasaplamakdan çäklenmän, eýsem, has giň mümkinçiliklere eýedir:

«Biziň kömekçimiz smartfonyň kamerasynyň kömegi bilen hakyky wagt tertibinde hereketleriň dogrulygyna gözegçilik edýär we maşklaryň nähili ýerine ýetirilýändigi barada jikme-jik maslahatlary berýär. Ulanyjynyň fiziki işjeňligi barada yzyna habar berip, ol diňe bir ädimleri hasaplaman, eýsem, dogry iýmitlenmäge kömek edýär, şikes ýetmek howpunyň öňüni alýar we iň esasy zat, maksatlara ýetmek üçin ruhlandyrýar».

Startapyň üstünligi täsirli maliýe görkezijileri bilen tassyklanýar. Ýakynda, iň soňky wençur maýa goýumynyň netijesinde, «KinesteX» 8 million ABŞ dollary möçberinde bahalandyryldy. Bu bazarda bary-ýogy üç ýyl işlemek bilen gazanylan ajaýyp üstünlikdir.

Permanyň we onuň pikirdeş adamlaryň taryhy, tehnologiýa bilen gyzyklanýan ýurdumyzyň ýaşlary üçin güýçli yşaratdyr. Ol batyrlygyň, innowasion pikiriň we tutanýerli zähmetiň ýerli startapy ählumumy mümkinçiligi bolan taslama öwrüp bilýändiginiň ruhlandyryjy mysaly bolup hyzmat edýär.