Hormatly Prezidentimiz Serdar Berdimuhamedowyň Karary bilen tassyklanan «Türkmenistanyň zähmet bazaryny 2030-njy ýyla çenli ösdürmegiň Konsepsiýasyny» durmuşa geçirmegiň çäklerinde, Türkmenistanyň Zähmet we ilaty durmuş taýdan goramak ministrligi häzirki zaman sanly çözgütlerini ornaşdyrmagy dowam etdirýär. Iş berijiler bilen iş gözleýänleriň özara baglanyşygynyň esasy guraly hökmünde ministrligiň resmi web-saýtynyň binýadynda işleýän Iş üpjünçilik portaly çykyş edýär.
Sanly maglumatlar raýatlara wagt düzüminde boş iş orunlaryny gözlemek we hünäri boýunça işe ýerleşmek üçin giň mümkinçilikleri döredýär.
Ýöriteleşdirilen sahypasy eýeçiliginiň görnüşine garamazdan ähli kärhanalara, şol sanda döwlet edaralaryna we hususy telekeçilere boş iş orunlary barada ilaty habardar etmäge mümkinçilik berýär. Iş gözleýänler bolsa öz bilimi, iş tejribesi we eýelemek isleýän wezipesi baradaky maglumatlary özbaşdak girizip, amatly işi saýlap almak üçin şertleri döredip bilýärler.
Mundan başga-da, saýt arkaly iş berijileriň boş iş orunlary we ätiýaçlandyryş tölegleri baradaky elektron hasabatlylyk ulgamy ýola goýuldy. Bu bolsa resminama dolanyşygyny ýönekeýleşdirýär we elýeterli sanly hyzmatlaryň gerimini giňeltmäge ýardam edýär.
Iş berijileriň islegleriniň seljermesiniň görkezişi ýaly, 2026-njy ýylyň başynda Türkmenistanyň zähmet bazarynda statistika, lukmançylyk, bilim ulgamyndaky hünärmenlere, şeýle hem sürüjilere we dürli kömekçi işçilere uly isleg bildirilýär. Şunuň bilen birlikde, ýokary tehnologiýaly pudaklarda ýöriteleşdirilen bilimlere we ukyplara eýe bolan işgärlere bolan islegiň artýandygy bellenilýär.
Hünärmenleriň çaklamalaryna görä, şu ýyl dünýäniň zähmet bazarynda IT-hünärmenler, programma üpjünçiligini işläp düzüjiler, kiberhowpsuzlyk we maglumatlar bilen işlemek boýunça hünärmenler, şeýle hem gaýtadan dikeldilýän energiýa çeşmeleri ulgamynda işleýän inženerler öňdebaryjy orunlary eýelärler. Mundan başga-da, emeli aň bilen işlemek ukyby hünärleriň köpüsinde goşmaça artykmaçlyk bolmakdan çykyp, hökmany talaplaryň hataryna geçer.
Indi esasy sanly başarnyklara neýrotor ulgamlar üçin sowatly sowallary düzmek, emeli aňyň berýän jogaplarynyň hiline ekspert gözegçiligini amala aşyrmak, şeýle hem gündelik iş dowamynda ýöriteleşdirilen emeli aň gurallaryny bökdençsiz ulanmak ukyplary degişlidir.
Şeýle hem gurluşyk we önümçilik ulgamlarynda awtomatlaşdyrylan ulgamlar bilen doly çalşyp bolmajak ýokary hünärli işçi hünärlerine bolan ýokary isleg saklanyp galar.
Türkmenistanyň Zähmet we ilaty durmuş taýdan goramak ministrligi 2011-nji ýylda döredildi. Raýatlaryň işe ýerleşmek ulgamyny kämilleşdirmek maksady bilen, sebitlerde zähmet we ilatyň iş üpjünçiligi boýunça pudaklaýyn edaralar düzüldi. Şäherlerde we etrap merkezlerde iş berijileriň häzirki wagtda bar bolan boş iş orunlaryny tanyşdyrýan çäreleri yzygiderli geçirilýär.
Ýurdumyzda soňky ýyllarda amala aşyrylýan işjeň maýa goýum syýasaty we maksatnamalaýyn özgertmeler her ýyl müňlerçe täze iş orunlarynyň döredilmegine ýardam edýär. Munuň bilen bir hatarda, ilatyň iş üpjünçilik derejesini ýokarlandyrmaga, öndürijilikli güýçleri ösdürmäge we bu ulgamdaky kadalaşdyryjy-hukuk binýadyny yzygiderli kämilleşdirmäge gönükdirilen çäreler durmuşa geçirilýär.
