17-nji fewralda Türkmenistanyň Daşary işler ministrliginde Ýewropa Bileleşigi bilen geçen ýyldaky giň hyzmatdaşlygyň netijelerini jemlemek we 2026-njy ýyl üçin esasy ugurlary kesgitlemek boýunça metbugat mejlisi geçirildi.
ÝB-niň Türkmenistandaky ilçisi Beata Peksa hyzmatdaşlygyň hem strategik infrastruktura taslamalaryny, hem ynsanperwer başlangyçlary öz içine alýan täze derejä çykandygyny nygtady.
Diplomatyň belleýşi ýaly, geçen ýyl depginli gepleşikler we ylalaşyklaryň amaly taýdan durmuşa geçiriliş döwri boldy.
B.Peksa iň möhüm wakalaryň arasynda ulag we logistika meselesini belledi. Onda aýratyn üns «Global derwezeler» (Global Gateway) taslamasyna berlipdi. Taraplar oktýabr aýynda Hazaraşa ulag geçelgesini döretmegiň «Ýol kartasyny» we sebitleýin howpsuzlygy jikme-jik ara alyp maslahatlaşdylar. Bu gün tertibiniň çäginde Brýusselde Owganystandaky ýagdaýa, ekologiýa we raýat jemgyýetine üns bermek bilen, Merkezi Aziýada durnuklylyk boýunça maslahatlar geçirildi. Bu gün tertibi boýunça bilelikdäki işler howanyň üýtgemegine uýgunlaşmak, daşky gurşawy goramak we energiýanyň netijeliligini artdyrmak ýaly meselelere hem degişli boldy.
ÝB-niň ilçisi, şeýle hem, Türkmenistanyň dürli ugurlar boýunça sebitleýin we milli mowzuky taslamalara işjeň gatnaşýandygyny nygtady.
«Jemläp aýdanymyzda, geçen ýyl ÝB tarapyndan maliýeleşdirilen jemi bilelikdäki 547 dürli taslama durmuşa geçirildi. Oňa dürli ýaşdaky 29 müňden gowrak türkmen raýaty gatnaşdy» diýip, B.Peksa jemledi.
Meýilnamalar barada aýtmak bilen, ol şu ýylyň esasy ugry ykdysady gatnaşyklary berkitmek we hususy pudagy goldamak boljakdygyny belledi.
B.Peksa işewürlik işjeňligini höweslendirmeli iri möçberli bir çäräni yglan etdi.
«Ýakyn geljek üçin meýilleşdirilýän uly çärä ünsi çekmek isleýärin. Bu 26-njy martda geçirilmegi meýilleşdirilýän ilkinji bilelikdäki Ýewropa Bileleşigi – Türkmenistan işewürlik forumydyr. Biz türkmen telekeçileriniň wekillerini bu çärä işjeň gatnaşmaga çagyrýarys. Hasaba alyş 23-nji fewrala çenli açyk. ÝB tarapyndan söwda pudagyna, senagata, IT we bilim ulgamlaryna wekilçilik edýän dünýä belli kompaniýalaryň köpüsi gatnaşmaga isleg bildirdi» diýip, ilçi aýtdy.
Ýewropa diplomatik edarasynyň ýolbaşçysy, şeýle hem ykdysady we işewürlik hyzmatdaşlykdan başga-da, Türkmenistan bilen ÝB-niň kiberhowpsuzlyk, infrastrukturany ösdürmek we daşary ýurt maýa goýumlaryny çekmek boýunça işlemegini dowam etdirjekdigini aýtdy.
Çykyşynyň ahyrynda ÝB-niň ilçisi degişli başlangyçlary şahsy goldaýandyklary we bütindünýä gün tertibine goşýan oňyn goşantlary üçin türkmen halkynyň Milli Lideri Gurbanguly Berdimuhamedowa we Türkmenistanyň Prezidenti Serdar Berdimuhamedowa çuňňur hoşallyk bildirdi. Şu nukdaýnazardan, B.Peksa ikitaraplaýyn saparlaryň we çylşyrymly meseleleri ara alyp, açyk maslahatlaşmaga isleginiň barlygy Türkmenistanyň sebitde Ýewropa üçin möhüm strategik hyzmatdaş hökmündäki derejesini tassyklaýandygyny aýtmak bilen, sözüni jemledi.
