Gadymy hem-de müdimi türkmen halkynyň asyrlaryň aňyrsyndan gaýdýan nusgalyk dünýäsiniň nesillere geçiren iň naýbaşy milli mirasynyň biri bolan ahalteke bedewleri Berkarar döwletiň täze eýýamynyň Galkynyşy döwrüniň belent ruhuna, milletiň mertebesine öwrülip dünýä çykýar. Onuň gözbaşynda bolsa Gahryman Arkadagymyzyň atşynaslyk baradaky ata-babalarymyzyň seýisçilik däbinden başlanýan dürdäne paýhasly beýik taglymaty dur.
Berkarar döwletiň täze eýýamynyň Galkynyşy döwründe türkmen halkynyň Milli Lideriniň hem-de hormatly Prezidentimiziň beýik başlangyçlary netijesinde bedew atlaryny ykbalynyň, atşynaslyk sungatyny ahwalynyň bir bölegine öwren türkmen halkynyň aty çapýar, bagty çapýar. Şu ýylyň ilkinji aýynda Monako Knýazlygynyň Monte-Karlo şäherinde geçirilen halkara sirk sungaty festiwalynda sirk sungatyna goşan uly goşandy üçin dünýä meşhur «Galkynyş» milli at üstündäki oýunlar toparyna Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalarynyň gowşurylmagy ýokarda aýdylanlaryň buýsançly subutnamasydyr.
Hormatly Prezidentimiziň üstümizdäki ýylyň 13-nji fewralynda geçiren Ministrler Kabinetiniň giňişleýin mejlisinde 2026-njy ýylyň «Garaşsyz, baky Bitarap Türkmenistan – bedew batly at myradyň mekany» ýyly diýlip yglan edilmegi mynasybetli atçylyk we atly sport ugurlary boýunça çäreleriň Maksatnamalarynyň işlenip taýýarlanandygyny aýdyp, bu baradaky ýörite resminama gol çekmekligi ýurdumyzda behişdi bedewlerimiz bilen baglanyşykly dabaralara badalga berildi. Bu şanly wakalar esasynda şan-şöhraty dünýä ýaň salan «Galkynyş» milli at üstündäki oýunlar toparynyň Arkadag şäherinde başlanan dabaraly ýörişi berkarar Diýarymyzyň Balkan we Daşoguz welaýatlaryna saparyndan soňra, ýurdumyzyň Gündogar sebitine gönükdi. «Galkynyş» milli at üstündäki oýunlar toparyny welaýatyň Taryhy we ülkäni öwreniş muzeýiniň öňündäki toý lybasly meýdançada ýaşuly nesliň we jemgyýetçilik guramalarynyň wekilleri, medeniýet hem-de sungat işgärleri, şäheriň ýaşaýjylary duz-çörek bilen garşy aldylar. Soňra medeni çykyşlara badalga berildi.
Seýitnazar Seýdi adyndaky döwlet sazly drama teatrynyň döredijilik toparynyň bedew ata ilkinji gezek atlanýan ýetginjege ak pata bermek däbini suratlandyrýan edebi-sazly kompozisiýasy bagşylar toparynyň joşgunly aýdymlary bilen utgaşdy. Şowhunly çykyşlardan soňra «Galkynyş» milli at üstündäki oýunlar toparynyň agzalary muzeý gymmatlyklary hem-de bu ýerde ýaýbaňlandyrylan halkymyzyň gadymyýetden gelýän atşynaslyk sungatyny, amaly-haşam we el işlerini, dutar ýasamak senetçiligini, türkmen halkynyň Milli Lideriniň hem-de hormatly Prezidentimiziň paýhas ummanyndan dörän ajaýyp kitaplaryny beýan edýän sergi bilen tanyşdylar. Bu ýerdäki täsirli dabaralardan soňra «Galkynyş» milli at üstündäki oýunlar topary şäheriň «Bitarap Türkmenistan» şaýolunyň ugry bilen «Türkmeniň ak öýi» binasyna tarap ýola düşdi.
Bu ýörişiň dowamynda toparyň agzalary döwrebap binalaryň, şol sanda, Seýitnazar Seýdi adyndaky döwlet sazly drama teatrynyň we welaýat kitaphanasynyň öňündäki bezemen meýdançalarda sahnalaşdyrylan bedew atlarymyzyň äleme dolan gadyr-gymmaty baradaky, welaýat ýörite sungat mekdebiniň «Galkynyş» milli at üstündäki oýunlar toparynyň gazanýan ajaýyp ýeňişlerini şöhlelendirýän edebi-sazly kompozisiýalaryny synladylar, şeýle hem behişdi bedewlerimizi wasp edýän şowhunly aýdym-sazlarydyr tanslara tomaşa etdiler. Ýörişiň bütin dowamynda ýoluň iki gyrasynda «Galkynyş» milli at üstündäki oýunlar toparyny toý mähellesiniň şowhunly elçarpyşmalar, alkyş sözleri bilen garşy almaklary bagtyýar raýatlarymyzyň bu meşhur topara goýýan belent sarpasynyň ýüze çykmasyna öwrüldi. Soňra «Galkynyş» milli at üstündäki oýunlar toparynyň ýörişi Türkmenabat şäheriniň «Türkmeniň ak öýi» binasyna tarap gönükdi. Bu ýerde topar sahnalaşdyrylan çykyşlar, medeniýet we sungat işgärleriniň ajaýyp aýdymlary we tanslary bilen garşylandy.
Ýurdumyzda ýetilýän belent sepgitleriň mazmuny bilen sazlaşýan çykyşlardan soňra, at üstüniň oýunlarynyň ussatlary bagşy-sazandalaryň joşgunly aýdymlary bilen binanyň içinde milli mirasymyzy, şol sanda, atşynaslyk ýörelgelerini şöhlelendirýän sergi bilen tanyşdylar. Soňra «Türkmeniň ak öýi» binasynyň tomaşalar zalynda çykyşlara nobat berildi. Gahryman Arkadagymyzyň hem-de Arkadagly Gahryman Serdarymyzyň parasatly baştutanlygynda ýurdumyzda milli mirasymyzyň iň naýbaşylarynyň biri ahalteke bedewlerimize goýulýan belent sarpa, «Galkynyş» milli at üstündäki oýunlar toparynyň halkara möçberindäki ajaýyp üstünlikleri çykyp geplemeleriň özenini düzdi. Çykyşlardan soňra dabara gatnaşyjylar tarapyndan hormatly Prezidentimiziň adyna Ýüzlenme kabul edildi. «Türkmeniň ak öýi» binasynyň ajaýyp sahnasynda ýaýbaňlandyrylan medeni çykyşlar bu dabara aýratyn röwüş çaýdy. Bu ýerde teatryň sahna ussatlarynyň taýýarlan behişdi bedewlerimiz baradaky sahnasy, sungat işgärleriniň bedewe atlanyp, eşretli eýýamymyzy, türkmen bedewlerimizi wasp edýän aýdymlary, milli tanslar ajaýyp binanyň tomaşa zalyna ýygnanan müňlerçe bedew janköýerleriniň kalplaryna ganat bekledi.
Dabaranyň dowamy «Galkynyş» milli at üstündäki oýunlar toparynyň çykyşlary bilen utgaşdy. Toparyň ezber ýigitleridir gyzlarynyň at üstündäki haýran galdyryjy hereketleri, onuň bedew atlaryň tizligi bilen täsin sazlaşygy bu ýere ýygnanan tomaşaçylar tarapyndan şowhunly we dowamly elçarpyşmalar bilen garşy alyndy. «Galkynyş» milli at üstündäki oýunlar toparynyň halkara möçberindäki ajaýyp üstünlikleri Gahryman Arkadagymyzyň hem-de Arkadagly Gahryman Serdarymyzyň bu toparyň şowly çykyş etmegi üçin döredip berýän giň şertleri bilen baglanyşyklydyr.
Mälim bolşy ýaly Gahryman Arkadagymyz ýaňy-ýakynda Arkadag şäherindäki Aba Annaýew adyndaky Halkara atçylyk akademiýasynyň «At-myrat» okuw merkezine baryp, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan «At-myrat» okuw merkezine 1 million 500 müň manat möçberinde pul sowgadyny, «Galkynyş» milli at üstündäki oýunlar toparyna Garaşsyz atly ajaýyp bedewi hem-de toparyň agzalarynyň her birine nepislik bilen ýasalan at eýerini gowşurmaklygy, şeýle hem hormatly Prezidentimiziň «Galkynyş» milli at üstündäki oýunlar toparynyň maddy-enjamlaýyn binýadyny has-da berkitmek baradaky çözgüdi esasynda 3 million manat möçberindäki pul sylagyny bermekligi bu toparyň hem-de bagtyýar halkymyzyň buýsanjyna we hoşallygyna öwrüldi.
«Galkynyş» milli at üstündäki oýunlar toparynyň Lebap welaýatyna sapary bilen baglanyşykly ýokary ruhubelentlige beslenip geçirilen dabaralar Gahryman Arkadagymyzyň hem-de Arkadagly Gahryman Serdarymyzyň başda durmagynda mertebesi arşa, şany dünýä dolýan ata Watanymyzyň her bir gününiň toý-baýramlara beslenýändiginiň buýsançly subutnamasydyr.
Şowhunly dabaralardan soňra «Türkmeniň ak öýi» binasynyň köpçülikleýin dabaralar geçirilýän binasynda agzaçar sadakasy berildi.
