Türkmenistanda «Ak şäherim Aşgabat» atly XXV köpugurly halkara sergisi we maslahaty geçirmäge taýýarlyk işleri işjeň dowam edýär. Bu çäre 24 – 25-nji maý aralygynda ýurdumyzyň paýtagtynda geçiriler. Aşgabat şäheriniň güni mynasybetli guralýan bu ýubileý forumy binagärlik, şähergurluşyk, senagat ösüşi hem-de durnukly geljek bilen bagly meseleleri özünde jemläp, halkara derejesinde möhüm waka bolmagyna garaşylýar.
Garaşylýan çäre adatça döwlet edaralarynyň, halkara guramalaryň, işewür toparlaryň, şeýle hem öňdebaryjy binagärlik, inženerçilik we gurluşyk kompaniýalarynyň wekillerini birleşdirer. Forum her ýyl öz amaly ugruny tassyklaýar we anyk taslamalaryň hem-de maýa goýum başlangyçlarynyň emele gelmegi üçin meýdança bolup hyzmat edýär.
Forumyň baý işewürlik maksatnamasy onuň aýratyn ähmiýetini kesgitleýär. Esasy çäreler Türkmenistanyň Söwda-senagat edarasynyň binasynda we «Olimpiýa» myhmanhanasynda geçiriler. Maksatnama serginiň resmi açylyş dabarasyny, tematiki sessiýalary, halkara guramalaryň gatnaşmagynda ýokary derejeli «tegelek stol» duşuşygyny, şeýle hem forumyň esasy wakasy boljak plenar mejlisi öz içine alýar.
Geljekki forumyň möhüm halkara aýratynlyklarynyň biri Birleşen Milletler Guramasynyň ulgamynyň işjeň gatnaşmagydyr. Soňky ýyllarda durnukly şäher ösüşi boýunça global gün tertibi BMG-niň Habitat maksatnamasynyň howandarlygynda geçirilýän World Urban Forum ýaly abraýly halkara meýdançalarda ösdürilýär. Şeýle nukdaýnazardan «Ak şäherim Aşgabat» atly XXV köpugurly halkara sergisi we maslahaty halkara dialogyň dowamyna öwrülip, konseptual pikir alyşmalardan amaly şähergurluşyk çözgütleriniň durmuşa geçirilmegini üpjün edýär.
Çäräniň ýokary halkara derejesi esasy «tegelek stol» duşuşygyna gatnaşjaklaryň düzümi bilen hem tassyklanýar. Garaşylýan çykyş edijileriň arasynda – Tatýana Molçan – Birleşen Milletler Guramasynyň Ýewropa boýunça ykdysady komissiýasynyň Ýerine ýetiriji sekretary, Katýa Şafer – BMG-niň Ilatly nokatlar boýunça maksatnamasynyň sebitara geňeşçisi, Erfan Ali – BMG-niň Ilatly nokatlar boýunça maksatnamasynyň Gündogar Ýewropa we Merkezi Aziýa sebitleri boýunça direktory, şeýle hem BMG-niň Ösüş maksatnamasynyň Türkmenistandaky hemişelik wekili Narine Sahakýan bar.
«Tegelek stol» duşuşygyna şeýle hem UNIDO-nyň wekilleri, halkara ösüş institutlary, degişli ugurly halkara bilermenler, hususy pudagyň, akademiki jemgyýetiň we ýaşlar guramalarynyň wekilleri gatnaşarlar. Şeýle giň we abraýly gatnaşyjylar düzümi foruma aýratyn ähmiýet berýär hem-de onuň durnukly ösüş babatda amaly çözgütleri işläp taýýarlamakdaky wezipesini güýçlendirýär.
Işewürlik maksatnamasynyň merkezi wakasy ýokary derejeli «tegelek stol» duşuşygyndan soň geçiriljek plenar mejlis bolar. Bu mejlis halkara işewürliginiň we pudagyň esasy wekillerini birleşdirer.
Plenar mejlisinde çykyş edijileriniň arasynda – «Çalık Holding» kompaniýasynyň ýolbaşçysy Ahmet Çalyk, «Rönesans Holding» kompaniýasynyň ýolbaşçysy Erman Ylyjak, Wladimir Petruk – «Interbudmontaž» kompaniýasynyň dolandyryjy müdiri, Erfan Ali – BMG-niň Ilatly nokatlar boýunça maksatnamasynyň Gündogar Ýewropa we Merkezi Aziýa sebitleri boýunça direktory, şeýle hem iri halkara kompaniýalarynyň beýleki ýolbaşçylary bar. Olaryň gatnaşmagy işewür hyzmatdaşlygyň ýokary derejesini we forumyň amaly netijelere hem-de maýa goýum hyzmatdaşlygyna gönükdirilendigini görkezýär.
Geçirilen ýyllaryň dowamynda «Ak şäherim Aşgabat» forumy binagärlik, gurluşyk we senagat ugurlarynda hünär dialogyny ösdürmäge ýardam edýän abraýly halkara meýdança hökmünde özüni görkezdi. Soňky forum 30-dan gowrak ýurtdan 550-den hem köp gatnaşyjyny birleşdirip, Türkmenistanda amala aşyrylýan taslamalara halkara jemgyýetçiliginiň durnukly gyzyklanmasyny tassyklady.
Şu ýylda gatnaşyjylaryň geografiýasynyň giňelmegi dowam edýär. Häzirki wagtda 25 ýurtdan 100-den gowrak wekiliň hasaba alnandygy, ýubileý forumyna halkara derejesinde uly gyzyklanmanyň bardygyny görkezýär. Şol bir wagtyň özünde «Ak şäherim Aşgabat» atly XXV köpugurly halkara sergisi we maslahaty diňe bir möhüm meseleleriň ara alnyp maslahatlaşylýan meýdançasy bolman, eýsem maýa goýum başlangyçlaryny öňe sürmek, öňdebaryjy tejribäni alyşmak we özara bähbitli hyzmatdaşlygy ösdürmek üçin täsirli gural bolup çykyş edýär.
Forumyň ikinji güni şäher transformasiýasyny maliýeleşdirmek, senagat we gurluşyk pudagyny ösdürmek, energetika ulgamlaryny kämilleşdirmek, hünärmenleri taýýarlamak hem-de innowasion çözgütleri ornaşdyrmak meselelerine bagyşlanar. Şeýle hem anyk taslamalary ösdürmäge we maýa goýum hyzmatdaşlygyny giňeltmäge gönükdirilen ikitaraplaýyn duşuşyklar geçiriler.
Forumyň mazmuny «Aşgabat 2045» atly strategik mowzuga gönükdiriler. Bu ugur durnukly, döwrebap we tehnologik taýdan ösen paýtagty döretmegi göz öňünde tutýar. Ara alnyp maslahatlaşmalarda şäher infrastrukturasyny dolandyrmakda sanly çözgütleriň ornaşdyrylmagyna, energiýa tygşytlaýjy gurluşyga, häzirki zaman taslama tehnologiýalarynyň ulanylmagyna, şeýle hem senagat we energetika mümkinçilikleriniň bitewi ösüş ulgamyna birleşdirilmegine aýratyn üns berler.
2026-njy ýylda forumyň döwlet edaralarynyň, halkara guramalaryň we işewür toparlaryň köp sanly wekillerini birleşdirmegine garaşylýar. Bu bolsa «Ak şäherim Aşgabat» forumynyň giň maýa goýum we maglumat mümkinçiliklerine eýe bolan iri halkara sergi-maslahat meýdançasy hökmünde derejesini tassyklaýar.
Şeýlelik bilen, «Ak şäherim Aşgabat» atly XXV köpugurly halkara sergisi we maslahaty ösüşiň täze tapgyryna gadam basýar. Halkara gyzyklanmanyň ýokary derejesi, abraýly guramalaryň gatnaşmagy, giň mazmunly gün tertibi we amaly ugur forumyň Aşgabady binagärlik, innowasiýa we durnukly ösüş merkezi hökmünde has-da berkitmegine şert döredýär.
Garaşylýan forumyň Türkmenistanyň paýtagtynyň ösüşinde möhüm ädim boljakdygyna, halkara hyzmatdaşlygy berkitjekdigine we durnukly durmuş-ykdysady ösüşe gönükdirilen täze taslamalar üçin mümkinçilikleri açjakdygyna şübhe ýok.
Forumda göni gatnaşmak üçin hasaba alyş dowam edýär. Arzalary kabul etmegiň soňky möhleti – 2026-njy ýylyň 10-njy maýy. Has giňişleýin maglumatlary WCA 2026-nyň resmi web sahypasynda tapyp bilersiňiz.
