Mary welaýatynyň Tagtabazar etrabynda ýerleşýän Galaýmor kän hojalygyna täze tehnikalaryň ornaşdyrylmagy önümçilikde uly öňegidişlikleri gazanmaga mümkinçilik berýär.
Berkarar döwletiň täze eýýamynyň Galkynyşy döwründe giden uly gurluşyk meýdanyna öwrülen döwletli Diýarymyzy durmuş-ykdysady taýdan ösdürmekde alnyp barylýan giň gerimli işler halkymyzyň bagtyýar ýaşaýşyna gönükdirilýär. Gurluşyk pudagynda ösen islegleri kanagatlandyrýan dürli görnüşli, ýokary hilli önümleri öndürmekde dünýä belli kompaniýalaryň kämil enjamlarynyň hyzmatyndan peýdalanylýar.
Türkmenistanyň Senagat we gurluşyk önümçiligi ministrliginiň Galaýmor kän hojalygyna «Garaşsyz, baky Bitarap Türkmenistan – bedew batly at-myradyň mekany» ýylynyň başynda Hytaý Halk Respublikasynyň dünýä belli gurluşyk tehnikalaryny öndürýän kompaniýalarynyň ýokary öndürjilikli tehnikalary tapgyrlaýyn gelip gowuşdy. Hojalyga täze gelip gowuşan «Sany Heavy Industry Co., Ltd.» kompaniýasynyň SY415H kysymly ýer gazyjy, SYZ320C-8Y kysymly ýük daşaýjy awtoulaglarynyň hem-de XCMG ZL50GN kysymly ýük ýükleýji kuwwatly tehnikalaryň uly tapgyry öňki bar bolan tehnikalaryň üstüni ýetirdi. Bu kuwwatly tehnikalar tejribeli hünärmenlere berkidilip, aýawly hem netijeli peýdalanylýar.
Işleri üç çalşykda alynyp barylýan kän hojalygynda ýedi sany owradyjy saýlaýjy fabrikleri hereket edýär. Olarda esasy çig maly bolan çagyl-çäge garyndysyndan dürli görnüşde we dürli ölçegde ýuwulan çäge, daş owuntygy ýaly magdan däl gurluşyk önümleri öndürilýär. Bu ýerde ýerasty gurluşyk materiallarynyň ummasyz gory ýerleşýär. Kärhanada ýerasty baýlyklary gazyp alyp, gaýtadan işläp önümçilige goşmakda uly işler geçirilýär. Gurluşyk önümlerine bolan islegiň artmagy bilen önümçiligiň depgini barha ýokarlandyrylýar. Hojalykda her aý bellenilen meýilnama üstünlikli berjaý edilýär. Geçen 3 aýda 97 müň 36 metr kub magdan däl önümleri öndürildi. Galaýmor kän hojalygynda öndürilen taýýar önümler awtoulag we demir ýol arkaly alyjylara ýetirilýär. Bu ýerde 141 işgär zähmet çekýär. Döwrüň talaplaryndan ugur alyp hojalygyň işgärleri önümçilige täze döredijilik gözlegleri bilen çemeleşýärler.
