Türkmenistanyň Senagatçylar we telekeçiler birleşmesiniň agzasy bolan Mary şäherindäki «Nepis» haryt nyşanly jorap önümlerini öndürýän hususy kärhananyň önümleri hil taýdan aýratynlygy bilen tapawutlanýar.

Ýurdumyzda kiçi we orta telekeçiligi ösdürmekde döredilýän mümkinçilikler işewür telekeçileri döredijilikli zähmet çekmäge, bazarlarymyzda haryt bolçulygyny ýokarlandyrmaga ruhlandyrýar. Şondan ugur alyp işleýän «Nepis» haryt nyşanly hususy kärhanada 1 ýylda 4,5 milliondan – 4 million 700 müň jübüde çenli jorap möwsümleýin isleglere görä öndürilýär. Bu döwrebap kärhananyň önümçiliginde erkek adamlar, zenanlar, çagalar, ýetginjekler üçin niýetlenen dürli ölçegdäki joraplaryň atlandyrylan esasy görnüşleriniň 15-si, olaryň hem her haýsynyň onlarça görnüşleri bar.

Kuwwatly kärhana edara binasyndan, dokaýjy we taýýarlaýjy bölümlerden, ammar jaýlaryndan ybarat. Taýýarlaýjy bölümde önümiň tikin işleri, haryt nyşanyny ýelimlemek, ütüklemek we gaplama işleri ýerine ýetirilýär. Bu ýerde Hytaý Halk Respublikasynyň dünýä belli kompaniýalarynyň enjamlary ornaşdyrylan. Öz işlerini iki iş çalşygynda dolandyrýan kärhanada 35 işçi zähmet çekýär. Önümçilikde öz topragymyzda öndürilen ak pagtamyz giňden ulanylýar. Häzirki wagtda öz ýerli pagtamyz bilen birlikde esasan çig mal Hytaý Halk Respublikasyndan satyn alynýar. Jorap önümleriniň düzüminiň 80 göteriminiň pagtadan ybarat bolmagy ynsan saglygy üçin ýakymlylygy döredýär.

Mukaddes Garaşsyzlygymyzyň 35 ýyllygy toýlanýan bu şanly ýylda kärhana öz önümçiligini giňeltmek, daşary bazara eksport mümkinçiligini döretmek maksady bilen täze önümçilik binalarynyň gurluşygyna badalga berdi. Täze önümçilik desgalary doly enjamlaşdyrylyp işe girizilenden soň, kärhananyň önümçiligi iki esse ýokarlanar. Ýene täze iş orunlary dörediler. Bu bolsa döwlet tarapyndan telekeçilere berilýän goldawlaryň aýdyň netijesi bolup durýar. Täze binada Hytaý Halk Respublikasynyň hem-de Italiýa döwletiniň jorap önümçiligindäki ýokary öndürjilikli döwrebap enjamlaryny ornaşdyrmak göz öňünde tutulýar.