Maýa Kulyýewa adyndaky Türkmen milli konserwatoriýasynda 1941 – 1945-nji ýyllaryň Beýik Watançylyk urşunda gazanylan Ýeňşiň 81 ýyllygy mynasybetli dabaraly konsert geçirildi.
Çärä uly nesliň wekilleri, ýaşlar we çagalar ýygnandy. Köp çagalar deňizçileriň başgaplarynda we pilotkalarda bolsa, uly adamlar döşlerine Georgiý lentalaryny dakynypdyrlar. Uruş ýyllarynyň bu nyşanlary häzirki nesli gahrymançylykly geçmiş, olaryň ata-babalary bilen baglanyşdyrýar. Zalyň birinji hatarynda hormatly myhmanlar: şu ýylyň aprel aýynda 100 ýaşyny dolduran Beýik Watançylyk urşunyň weterany Sergeý Tewosowiç Adamýan, zähmet frontuna gatnaşyjy Lýudmila Wladimirowna Şelemetowa hem-de Leningrad gabawyny başdan geçiren Galina Alekseýewna Mämedowa ýerleşdi.
Konsertiň alyp baryjysy Güljemal Mülkiýewa giriş sözünde türkmenistanlylaryň garaşylan Ýeňşe goşan ägirt uly goşandy barada gürrüň berdi. Güljemalyň Mary welaýatyndan bolan Tagan Özbegiň maşgalasy baradaky gürrüňi tomaşaçylara güýçli täsir etdi. Bu maşgaladan 11 ogul urşa gidip, olaryň hiç biri yzyna dolanmandyr.
Ýeňiş güni mynasybetli konserwatoriýa uly baýramçylyk konsertini taýýarlady. Konsert başlanmazdan öň bir minutlyk dymyşlyk yglan edildi. Tomaşaçylar ýerinden turup, öz janyny pida eden esgerleriň hatyrasyna şol pursaty gynançly dymyşlykda geçirdi.
Konsert Arzygül Gylyjowanyň ýerine ýetirmeginde Hydyr Allanurowyň «Rekwiýem» eseri bilen açyldy. Arzygüliň sesinde uruşdan dolanmadyk ýanýoldaşyna bolan hasrat we ýürek agyrysy duýulýardy. Agşamyň konsert maksatnamasy örän baý we dürli öwüşginli boldy. Sahnada türkmen kompozitorlary Aman Agajykowyň, Nury Halmämmedowyň, Aýna Şirowanyň eserleri hem-de halkyň mukaddes hakydasy ýaly gorap saklaýan uruş ýyllarynyň aýdymlary ýerine ýetirildi. Şeýle hem konsertde garaşylmadyk ýagdaýda Çaýkowskiniň we Skrýabiniň nusgawy saz eserleri ýaňlandy. Konsertiň alyp baryjysynyň aýdyşyna görä, Leningrad gabawy döwründe açlykdan ejir çekýän şäherde ilkinji gezek Dmitriý Şostakowiçiň ýedinji simfoniýasy ýerine ýetirilip, bu eser duşmana garşy güýçli ruhy zarba bolupdyr hem-de leningradlylaryň diri galandygyny we boýun egmejekdigini subut edipdir.
Konserwatoriýanyň wokalçylarynyň owadan sesleri diňleýjileri ýene-de bir gezek haýrana goýdy. Türkmenistanyň at gazanan artistleri Leýli Ökdirowa we Aýna Seýitgulyýewa, Türkmenistanyň halk artisti Gülnar Nuryýewa, Begenç Moşşyýew, Begenç Gaýypow, Bahar Durdyýewa, Arzygül Gylyjowa ýaly sungat ussatlary nusgawy hem-de halk eserlerini ýokary ussatlyk bilen ýerine ýetirdiler.
Sahnada «Şäher bagynda», «Smuglýanka», «Zemlýankada», «Katýuşa», «Söýginiň owazy», «Garaňky gije», «Göwher ýaglyk» ýaly meşhur aýdymlar, şeýle hem Aýna Şirowanyň «Söýgi» romansy, Aman Agajykowyň «Gowganly gije», Nury Halmämedowyň «Esgeriň ýatlamasy» we beýleki eserler ýaňlandy.
Elbetde, konsert Beýik Watançylyk urşunyň aýdym-saz gimni hasaplanýan Dawid Tuhmanowyň «Ýeňiş güni» aýdymy jemlendi. Bu gün dünýäniň köp ýurtlarynda «Ýeňiş güni» aýdymy millionlarça gezek ýaňlandy. Konserwatoriýanyň sahnasynda bu aýdymy Begenç Gaýypow, Begenç Moşşyýew, Gülnar Nuryýewa we beýleki gatnaşyjylar ýerine ýetirdiler. Zal olara goşulyp aýdym aýtdy we dowamly el çarpyşmalar bilen goldaw berdi.
Kamera ansambly kafedrasy tarapyndan guralan «Ýeňiş güni» konserti uly üstünlik bilen geçdi. Agşamyň konsertmeýsteri we işjeň guramaçysy halkara bäsleşikleriniň diplomanty Stella Faramazowa boldy.
