Türkmenistanyň Döwlet şekillendiriş sungaty muzeýinde özboluşly sergi açyldy. Bu işleriň awtorlary hünärmen suratkeşler däl-de, eýsem, geljekde suratkeş bolmagy maksat edinýän zehinli çagalardyr.
Gürrüň Aşgabat şäherindäki 2-nji çagalar çeperçilik mekdebiniň okuwçylary barada barýar. Büzmeýin etrabynda ýerleşýän bu mekdep büzmeýinli oglan-gyzlaryň arasynda uly meşhurlyga eýedir. Mekdepde 200-e golaý okuwçynyň çeperçilik sungatynyň syrlaryny öwrenýändigini aýtmak hem ýeterlikdir. Olar şekillendiriş sungatynyň üç ugry – nakgaşlyk, zergärçilik we keramika boýunça bilim alýarlar. Muzeýdäki sergä mekdebiň okuwçylarynyň 500-e golaý işi hödürlenipdir.
«Men suratkeş däl, diňe öwrenýän» diýen jümle bu ýerdäki işleriň hemmesine degişli däl. Mysal üçin, Nazilýa Jafarowanyň diplom işi bolan «Azat Annaýewiň portreti» muňa aýdyň şaýatdyr. Nazilýanyň ilki «Doganymyň portreti» atly işini getirendigi, mugallymynyň bolsa ony halap: «Aganyň däl-de, suratkeşiň portretini çekseň has gowy bolardy» diýen maslahatyny berendigi mälim boldy. Nazilýa akwarel boýaglaryny eline alyp, belli sungaty öwreniji Azat Annaýewiň ajaýyp portretini döredipdir. Surat örän şowly çykypdyr. Nazilýa gahrymanyň diňe bir daşky keşbini däl, eýsem, içki dünýäsini we häsiýetini hem ussatlyk bilen şöhlelendirmegi başarypdyr.
Güljeren Allaberdiýewa özüniň «Ak şäherim Aşgabat» diýen grafika eserini görkezdi. Şaýollaryň göni çyzyklary, ak mermerli belent binalaryň anyk keşbi, diňe bir ýolagçynyň duran awtobus duralgasy – bu grafika özboluşly dizaýnerlik işini ýatladýar we esere döredijilik täsirini berýär.
Muzeýdäki gymmatlyklaryň döredilen ýeri bolan 2-nji çagalar çeperçilik mekdebi bilen Gülzada Annamyradowanyň çeken suraty arkaly tanyşmak bolýar. Ol özüniň söýýän mekdebiniň öň tarapyny, Magtymguly Pyragynyň heýkeli goýlan we açyk asmanda etýudnikleri bilen işleýän çagalaryny şekillendiripdir. Gülzada bu esere özüniň mähriban mekdebine bolan gyzgyn söýgüsini siňdirdi.
Bibi Sapargulyýewa bolsa öz portretini görkezdi. Tomaşaça mekdep lybasyndaky ýaşyl köýnekli gözel gyz seredip dur. Suratdaky parahat hem-de özüne ynamly garaýyş gyzyň mekdepde okan 4 ýylynyň içinde halypa mugallymlarynyň saýasynda uly sepgitleri açandygyny görkezýär.
Tumar Şagulyýewanyň «Balykçylar» atly triptihi aýratyn öwgä mynasypdyr. Tumar hakyky suratkeş ýaly tejribeli balykçylaryň durmuşyndan üç pursady şekillendiripdir. Gyzjagaz balykçylaryň zähmetini şeýle bir janypkeşlik we işi bilmeklik bilen beripdir welin, edil özi hem olaryň arasynda duran ýalydyr. Tumaryň özüne çekiji ýazuw aýratynlygy bar, Aşgabat şäherindäki 2-nji çagalar çeperçilik mekdebiniň bu uçurymynyň geljekde hem nakgaşlyk ugruny dowam etdirmegini arzuw edýäris.
Zergärçilik sungatyna gyzyklanýan çagalar tarapyndan milli äheňde döredilen ajaýyp işler görkezildi. Gadym zamanlardan bäri türkmen zergärleriniň sungaty ýurdumyzyň çäklerinden uzaklarda hem meşhur bolupdyr. Gadymy nagyşlary özleşdirip, zergärçilik bölüminde okaýan çagalar owadan monjuklary, gülýakalary, gulakhalkalary döredýärler. Olaryň iň gowy işleri sergide orun alypdyr.
Serginiň merkezini bolsa keramika işleri bezedi. Çagalar palçykdan dürli gap-çanaklary – gaplary, küýzeleri, tarelkalary, käseleri ýasaýarlar. Olaryň keramika işleri entek kämil bolmasa-da, reňkleriň utgaşmasynda uly şatlyk duýulýar. Açyk we arassa reňklerde çekilen mähirli suratlar ynsanda ýakymly duýgulary oýarýar.
Aşgabat şäherindäki 2-nji çagalar çeperçilik mekdebiniň okuwçylary sungat äleminde gazanan üstünlikleri bilen muzeýe gelenleri haýran galdyrdylar. Öz gezeginde, oglan-gyzlar hem öz işleriniň ýurdumyzyň iň abraýly şekillendiriş sungaty muzeýiniň sergide ýerleşdirmegine uly buýsanç bilen galkyndylar.
