Her ýyl 18-nji maýda ýurdumyzda Türkmenistanyň Konstitusiýasynyň we Döwlet baýdagynyň güni dabaraly ýagdaýda bellenilýär. Konstitusiýa bu raýatlaryň hukugyny, erkinligini güwä geçýän we borçlaryny berkidýän Esasy kanundyr. Türkmenistanyň Konstitusiýasynyň we Döwlet baýdagynyň güni mynasybetli Döwlet şekillendiriş sungaty muzeýiniň sergiler zalynda türkmen ussatlarynyň suratkeşlik we heýkeltaraşlyk işleriniň sergisi boldy.
Walentin Kudrýaşow öz watandaşlaryna ýerine ýetirilen birnäçe suratlary ýadygärlik goýdy. Türkmenistanyň Konstitusiýasynyň we Döwlet baýdagynyň güni mynasybetli geçirilýän sergileriň ählisinde hem onuň işleri bar. Olaryň biri «Türkmenistanyň Konstitusiýasy» diýlip atlandyrylýar, onda ýaşyl baýdagyň aşagynda oturan gyzjagaz we sahypalary uçuşýan senenama şekillendirilen.
Surat plakat görnüşinde çekilipdir, hatda senenamanyň käbir sahypalaryny futurizm görnüşinde surata ýelimläpdirler. Walentin Kudrýaşowyň bu suraty mowzugy gowy beýan edipdir.
Rejepgeldi Çüriýewiň «Galkynyş» atly suraty hem hemişe syýasy mowzuklarda ýer alýan işlerden biridir. Suratda ahalteke bedewi Watanymyzyň baýdagyny elinde göterip duran çapyksuwar bilen bile paýtagtymyzyň üstünde uçýan keşbi şekillendirilen.
Mämmet Mämmedowyň «Toý» atly eserinde ähli obadaşlaryň toýa gatnaşýandygy görkezilen. Myhmanlara hödür-kerem edilýär, at çapyşyklar geçirilýär. Bu eseriň döränine 50 ýyldan hem köpräk wagtyň bolandygyna garamazdan oňa bolan gyzyklanma ýitmeýär.
Baýrammyrat Esengeldiýew brigadirlerini şatlyk bilen ýokary göterýän işgärleriň heýkelini döredipdir. Bu heýkel syýasy senelere bagyşlanan ählihalk zähmet üstünligini suratlandyrýar.
Ýedi Matadow «Mukam» heýkelinde dutaryň owazy bilen saza özüni beren zehinli sazandanyň keşbi şekillendirilen.
Döwletimiziň parahatçylyk söýüjilikli syýasatyna Iwan Ilýiçiň türkmen zenany bilen iki sany daşary ýurtly zenany şekillendiren «Dostluk» atly oforty mysal bolup durýar. Belkide olar öz aralarynda eýýäm dost bolan çagalary barada gürleşýändirler.
Şeýle-de Walentin Kudrýaşowyň «Parfiýa ýaýlasy» eserinde Parfiýa giňişliklerine tarap açylyp gidýän Saglyk ýoluny şekillendiripdir. Onda geçmiş bilen geljegiň arasynda ýurdumyzyň esasy nyşany bolan baýdagymyz görkezilen. Surata syn eden adamda watansöýüjilik duýgusy oýanýar.
