Garaşsyz Döwletleriň Arkalaşygyna agza ýurtlaryň demir ýol ulagy boýunça Geňeşiniň 84-nji halkara mejlisiniň çäklerinde «Russiýademirýollary» (RDÝ) AGPJ-niň baş direktorynyň birinji orunbasary Sergeý Pawlow Türkmenistan bilen hyzmatdaşlygy giňeltmek meýilleri barada gürrüň berdi. Geljekde hyzmatdaşlyk diňe logistika bilen çäklenmän, eýsem, ýokary tehnologiýalary, bilim ulgamyny we özboluşly syýahatçylyk ugurlaryny ösdürmegi hem öz içine alar.
Hyzmatdaşlygyň esasy ugurlarynyň biri hökmünde Demirgazyk – Günorta halkara ulag geçelgesiniň Gündogar şahasynyň ösdürilmegi bolup durýar. S.Pawlowyň aýtmagyna görä, Russiýa, Gazagystan, Türkmenistan we Eýran konstruktiw dört taraplaýyn ylalaşygy işläp taýýarlaýarlar.
«Bu ylalaşyk ýükleri daşamagyň möhletlerini düzgünleşdirmäge we serhet geçelgeleriniň işini optimizirlemäge mümkinçilik berer. Biz demir ýol kompaniýalarymyzyň arasyndaky gatnaşyklary has-da berkitjek täze tapgyra geçmäge umyt edýäris» diýip, «Russiýademirýollary» (RDÝ) AGPJ-niň S.Pawlow belledi.
Logistikadan başga-da, «Russiýademirýollary» (RDÝ) AGPJ bilen Türkmenistanyň Demir ýol ulaglary ministrligi birnäçe strategik ugurlar boýunça hyzmatdaşlygy ösdürýärler. Olaryň hatarynda daşamalary dolandyrmakda häzirki zaman IT çözgütlerini ornaşdyrmak, işgärleri taýýarlamak, wekiliýetleri alyşmak we bilelikdäki bilim maksatnamalaryny durmuşa geçirmek, ýaşlar syýasatyny ösdürmek hem-de ynsanperwer hyzmatdaşlyk bar.
S.Pawlow rus tarapynyň meýilleşdirilen taslamalary mümkin boldugyça çalt durmuşa geçirmek üçin depginini güýçlendirmäge taýýardygyny aýtdy.
Syýahatçylyk ulgamyna aýratyn üns berildi. «Russiýademirýollary» (RDÝ) AGPJ-niň wekili Türkmenistanda taryhy mirasa aýawly çemeleşilmeginiň we häzirki zaman infrastrukturasynyň gurulmagynyň utgaşmasyna ýokary baha berdi.
«Men Moskwada Aşgabadyň suratlaryny görkezemde, adamlar haýran galyp: «Bu ýer nire?» diýip soraýarlar. Ak mermerli şäher – hakyky gudrat. Russiýada şeýle ugurlara gyzyklanma örän ýokary. «Russiýademirýollary» (RDÝ) AGPJ gadymy döwürlerden bäri dünýä ýollarynyň çatrygy bolan Türkmenistanyň mukaddes taryhy bilen ýurduň häzirki zaman keşbiniň utgaşmasynyň ägirt uly syýahatçylyk mümkinçiligi bolup durýandygyna ynanýarlar. Muny bolsa bilelikde güýçli derejede peýdalanmak bolar» diýip, S.Pawlow belledi.
