5-nji iýunda Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Gün tertibiniň esasy meselesi şu ýylyň ýanwar – maý aýlarynda milli ykdysadyýetiň pudaklarynda alnyp barlan işleriň jemlerini ara alyp maslahatlaşmakdan ybarat boldy.

Mejlisiň dowamynda Ministrler Kabinetiniň Başlygynyň orunbasary H.Geldimyradow şu ýylyň ilkinji bäş aýyndaky makroykdysady görkezijiler barada hasabat berdi. Hasabatda bellenilişi ýaly, hasabat döwründe Türkmenistanda ykdysady ösüşiň durnukly depgini üpjün edildi we jemi içerki önümiň (JIÖ) ösüşi 6,3 göterime deň boldy.

Hormatly Prezidentimiz Serdar Berdimuhamedow JIÖ-niň ýokary ösüş görkezijileriniň durmuşa geçirilýän döwlet maksatnamalarynyň netijeliligini aýdyň görkezýändigini kanagatlanma bilen belledi.

Döwlet Baştutanymyzyň nygtaýşy ýaly, ýurdumyzda esasy pudaklary öz içine alýan giň gerimli özgertmeler üstünlikli durmuşa geçirilýär, önümçilik ulgamlaryny döwrebaplaşdyrmak işi bolsa yzygiderli dowam etdirilýär.

Türkmenistanyň Prezidenti degişli ýolbaşçylara meýilleşdirilen ähli işleriň ýerine ýetirilişini berk gözegçilikde saklamagy hem-de kabul edilen döwlet maksatnamalaryna laýyklykda milli ykdysadyýetiň pudaklaryny yzygiderli ösdürmegi tabşyrdy.