Berkarar döwletiň täze eýýamynyň Galkynyşy döwründe ilatyň azyk bolçulygyny ýokarlandyrmaklyga ýurdumyzyň hususy ulgamy uly goşant goşýar. Hormatly Prezidentimiziň daşary ýurtdan getirilýän harytlaryň ornuny tutýan önümleri öz ýurdumyzda öndürmek baradaky tabşyryklaryndan ugur alyp zähmet çekýän şeýle kärhanalaryň biri-de Mary welaýatynda ýerleşýän «Erkin gurluşyk» hususy kärhanasydyr. Bu hususy kärhananyň ýöredýän iş ugurlarynyň biri hem döwletimiziň oba hojalyk ulgamynda maldarçylygyň ösmegine we azyk bolçulygyna goşant goşmakdan ybarat.
Kärhananyň hünärmenleriniň habar bermegine görä bu ugurda uly öňegidişlikler gazanylýar. «Erkin gurluşyk» hususy kärhanasynyň welaýatyň Oguzhan etrabynyň çäginde Oguzhan ýaýlasynda bölünip berlen 1 müň 500 gektar meýdanda ekerançylyk ýerleri bar. Şonuň 10 gektarynda kärhananyň maldarçylyk toplumy ýerleşýär. Bu maldarçylyk toplumynda 1 müňe golaý golşteýn tohumly iri şahly mallar idedilýär. Mallara talaba laýyk ideg edilmegi ilatymyzyň et we süýt önümleriniň bolçulygyna goşant goşmaga mümkinçilik berýär. Kärhananyň işjanly telekeçileri öz mallaryndan alynýan önümleri gaýtadan işlemekligi hem maksat edinýärler.
Mallardan oňat önüm almak üçin zerur şertleriň biri-de ot-iým üpjünçiligi bolup durýar. Mallaryň ot-iým üpjünçiligi göz öňünde tutulyp şu ýyl ekerançylyk meýdanlarynda 280 gektar ýerde ýorunja, 337 gektarda arpa, 13 gektarda mekgejöwen ýaly däneli ekinler ösdürilip ýetişdirildi. Kärhananyň öz hasabyndaky kuwwatly däne orujy kombaýnlaryň kömegi bilen häzir arpa hasylyny ýygnamak işleri güýçli depginde dowam etdirilýär. Arpadan boşan meýdanlara güýzlük gök-bakja ekinleri ekilýär.
Ekerançylyk meýdanlarynda hususy kärhananyň işgärleri bagçylygy ösdürmek işlerinde-de uly tagallalar edýärler. Bu ýerde kärhananyň zähmetsöýer bagbanlary dürli görnüşli miweli baglary ösdürip ýetişdirýärler. Birnäçe ýyllardan bäri bagçylyk hojalygynda ýetişdirilýän miweli baglaryň bereketli hasyly ak bazarlarymyzyň bolçulygyna goşant goşup, halkymyzyň toý saçaklaryny bezeýär. Şu ýyl hem bagbanlar miwe önümleriniň bol hasylyny ýetişdirdiler. Erigiň ir ýetişýän görnüşiniň hasyly doly ýygnalyp ýerlenildi. Häzirki wagtda almanyň irki görnüşleriniň hasylyny ýygnamak işleri guramaçylykly alnyp barylýar. Ýygnalýan miwe önümleri terligi bilen ýurdumyzyň ak bazarlaryna çykarylýar. Kärhananyň telekeçileri öz ýetişdirýän miwe önümlerini gaýtadan işleýän kärhanany gurmagy maksat edinýärler.
