Türkmen halkynyň milli mirasyna ser salanyňda, güller çemeni göz öňüňde janlanýar. Eziz enelerimiziň, mährem uýalarymyzyň çeper ellerinden çykan halylar, keşdelerdir nagyşlar, milli lybaslar, gelin-gyzlarymyzyň görküne görk goşýan, ajaýyp bedewlerimize zynat berýän zergärçilik sungaty Berkarar döwletiň täze eýýamynyň Galkynyşy döwrüniň belent ruhy bilen utgaşyp, dünýä medeniýetiniň aýrylmaz bölegine öwrülmegi türkmen milletiniň kalbyna nur çaýýar. Milli mirasymyzyň ençemesiniň ÝUNESKO-nyň adamzadyň maddy däl medeni mirasynyň görnükli nusgalarynyň sanawyna girizilmegi türkmen halkynyň mukaddeslikleriniň dünýä jemgyýetçiligi tarapyndan ykrar edilmegidir.
Ýokarda sanalan ajaýyp nusgalarymyz bilen birlikde, gadymy senediň inçe syrlaryny, köpýyllyk taryhy ýollaryny we milliligimiziň gaýtalanmajak gözelligini özünde jemleýän keçe taýýarlamak sungaty halkymyzyň ruhy dünýäsiniň iň kämil görnüşleriniň biridir. Zenan dünýäsiniň näzikligini, sabyrlylygyny, zähmetsöýerligini dünýä ýaýýan gymmatly mirasymyzyň her bir nagşynda ene-mamalarymyzyň kalbynyň ýylysy, el hünäriniň gudraty we asyrlarboýy dowam edip gelýän yrym-ynançlarymyz ýaşaýar. Halkymyzyň müňýyllyklaryň dowamynda döredip, kämilleşdirip gelen bu nepis sungatyny gorap saklamak, olary täzeçe öwüşginler bilen baýlaşdyryp, geljekki nesillere asyl nusgasynda ýetirmek berkarar Diýarymyzda döwlet syýasatynyň ileri tutulýan ugurlarynyň birine öwrüldi.
Zenanlarymyzyň kalbynyň mähri siňen el işlerini dabaralandyrmak, olaryň döredijilik ukybyny höweslendirmek maksady bilen durmuşa geçirilýän çäreler bolsa, bu asylly ýörelgeleri dowamata öwürýär. Şu maksatdan ugur alyp, Türkmenistanyň Zenanlar birleşiginiň Merkezi Geňeşiniň, Kärdeşler arkalaşyklarynyň Milli Merkeziniň hem-de ÝUNESKO-nyň işleri barada Türkmenistanyň milli toparynyň sekretariatynyň bilelikde yglan edýän «Gülüň owadan» atly bäsleşigi, eýýäm birnäçe ýyllardan bäri geçirilip, ene-mamalarymyzyň bu gadymy sungatyny nesillere geçirmekde aýratyn ähmiýete eýe bolýar.
Asyrlarboýy kämilleşip gelen milli amaly-haşam sungatymyzyň taryhy ähmiýetini we gymmatyny açyp görkezýän bu bäsleşigiň «Garaşsyz, baky Bitarap Türkmenistan — bedew batly at-myradyň mekany» ýylynda geçirilen Lebap welaýat tapgyry hem işjeň häsiýete eýe boldy.
Baý many-mazmuna beslenen täsirli dabarada welaýatyň etraplaryndan gelen çeper elli, gadymy senedimizi dikeltmäge hem-de ony ýaş nesle kämil görnüşinde ýetirmäge uly goşant goşýan zenanlar bäsleşdiler. Bäsleşigiň şertlerine görä, oňa gatnaşyjylar öz ukyplaryny üç ugur boýunça — ýüň daramak we boýamak sungatynyň syrlary, bu işde ulanylýan gurallar barada täsirli gürrüň bermek, bellenilen wagtyň dowamynda boýy 1,5 metr, ini 1,0 metr bolan keçäniň ýüzüne halkymyzyň gadymy milli nagyşlary bolan «Ak tüýnük», «Gyzyl tüýnük», «Gözenek», «Saýlan», «Gülýaýdy», «Gelinbarmak», «Gapyrga» ýaly nepis gülleri salyp, keçe güllemekde başarnyklaryny görkezmek, şeýle hem öz ýürek buýsançlaryny şahyrana setirleriň, aýdyşyklaryň üsti bilen beýan etmek ugurlary boýunça bäsleşdiler. Keçe sungatynyň köpasyrlyk taryhyndan gürrüň berýän gadymy rowaýatlar, nesilden-nesle geçip gelýän täsirli yrym-ynançlar, maşgala mukaddesligini açyp görkezýän däp-dessurlar baradaky çykyşlar dabaranyň ähmiýetini has-da artdyryp, ýaş nesillerimizde zenan edebini, asyllylyk häsiýetlerini we ene-mamalarymyzdan galan mukaddes el işlerine bolan söýgini kemala getirýän ajaýyp terbiýeçilik mekdebine öwrüldi. Bäsleşigiň çäginde guralan milli el işleriniň sergisi, folklor toparlarynyň çykyşlary çärä aýratyn milli öwüşgin berdi. Bäsleşigiň ahyrynda çeper elli ezber zenanlaryň taýýarlan işlerine, şahyrana çykyşlaryna eminler topary tarapyndan mynasyp baha berlip, bäsleşigiň ýeňijileri yglan edildi.
Örän täsirli geçen bäsleşigiň jemi boýunça 1-nji orna Saýat etrabyndan gelen çeper elli zenanlar Maýagözel Ýazkulyýewa hem-de Maýsa Ýazmyradowa mynasyp boldular we bäsleşigiň döwlet tapgyryna gatnaşmaga hukuk gazandylar. 2-nji orny Döwletli etrabynyň zenanlary Şemşat Kuwwatowa we Gülruh Möminowa, 3-nji orny bolsa Kerki etrabyndan gelen ezber zenanlar Nursoltan Annadurdyýewa hem-de Oguljuma Agamyradowa dagy eýelemegi başardylar.
