Türkmenistanyň wekiliýeti Özbegistan Respublikasynyň Daşkent we Samarkant şäherlerinde 24–29-njy awgust aralygynda geçirilýän «Yslam siwilizasiýasy: täze garaýyş, täze açyşlar» atly halkara mediaforumyna gatnaşýar. Forumyň işine dünýäniň 50-den gowrak ýurdundan köpçülikleýin habar beriş serişdeleriniň, ylmy we medeni ulgamlaryň wekilleri gatnaşýarlar. Bu barada Türkmenistanyň DIM-niň web-saýtynda habar berilýär. 

Plenar mejlisleriň dowamynda häzirki zaman media ulgamyny ösdürmek, taryhy-dokumental mazmuny döretmek, taryhy maglumatlary ylmy taýdan öwrenmek, neşirýat işi we sanly tehnologiýalary ornaşdyrmak meseleleri boýunça pikir alşyldy. Halkara hyzmatdaşlygy giňeltmäge we media ulgamynda bilelikdäki taslamalary durmuşa geçirmäge aýratyn üns berildi.

Forumyň çäklerinde taryhy ýadygärligi gorap saklamak, medeni mirasy giňden wagyz etmek we ony köpçülikleýin habar beriş serişdeleriniň hem-de sanly platformalaryň üsti bilen häzirki zaman jemgyýetçiligine ýetirmek meselelerine aýratyn ähmiýet berilýär.

27-nji awgustda halkara mediaforumynyň işi Samarkant şäherinde dowam etdiriler. Onda gatnaşyjylar şäheriň taryhy-medeni mirasy bilen tanyşarlar.

Türkmenistanyň wekiliýetiniň halkara mediaforumyna gatnaşmagy medeni-ynsanperwer we maglumat ulgamlaryndaky hyzmatdaşlygy mundan beýläk-de ösdürmäge, hünär gatnaşyklaryny giňeltmäge hem-de daşary ýurtly kärdeşler bilen tejribe alyşmaga ýardam berer.