Türkmenistanyň Oguz han adyndaky Inžener-tehnologiýalar uniwersitetiniň kiberfiziki ulgamlar kafedrasynyň mugallymy Nurjemal Baýramowa Ýaponiýanyň Hirosima uniwersiteti tarapyndan 19 – 28-nji oktýabr aralygynda geçirilýän Şöhleleriň dinamikasy we tizlendiriji tehnika boýunça 9-njy halkara okuw maksatnamasyna (ISBA 2026) gatnaşýar.
Bu halkara okuw başlangyjy dürli ýurtlardan gatnaşyjylary birleşdirýär hem-de halkara ylym we bilim hyzmatdaşlygyny ösdürmäge, hünärmenleri taýýarlamaga, ugurdaş ýokary okuw mekdepleriniň mugallymlarynyň hünärini kämilleşdirmäge, şeýle hem öňdebaryjy tehnologiýalar ulgamynda tejribe alyşmaga ýardam edýär.
Şu ýylyň okuw maksatnamasynyň dowamynda gatnaşyjylar toplumlaryň dinamikasy we tizlendiriji tehnika boýunça nazary bilimlerini çuňlaşdyrmak, şeýle hem bu ugurdaky döwrebap ylmy-tehniki üstünlikleri öwrenmek mümkinçiligini alarlar.
Hirosima uniwersitetiniň öňdebaryjy professorlarynyň ýolbaşçylygyndaky okuw sapaklarda diňleýjiler pudagyň esasy nazary düşünjeleri bilen tanyşarlar we tizlendiriji tehnologiýalaryň iş ýörelgeleri hem-de aýratynlyklary baradaky bilimlerini giňelderler.
Meýilnamanyň medeni çäginde gatnaşyjylar üçin Hirosimanyň taryhy ýerlerine we gözel künjeklerine syýahatlar guralýar, bu bolsa olara şäheriň taryhy, özboluşly aýratynlyklary we ýerli ilatyň milli däp-dessurlary bilen has ýakyndan tanyşmaga mümkinçilik berýär.
Türkmen mugallymynyň bu maksatnama gatnaşmagy iki ýurduň arasynda ylym we tehnologiýa ulgamyndaky gatnaşyklaryň has-da ösmegine, bilimiň hiliniň kämilleşdirmäge, ylmy mümkinçilikleriň artdyrylmagyna we bilim beriş işine innowasiýalaryň ornaşdyrylmagyna goşant goşar. Maksatnamanyň çäginde alnan gymmatly bilimler we tejribe geljekde türkmen uniwersitetiniň okuw-terbiýeçilik we ylmy-barlag işlerinde üstünlikli ulanylar.
