Ï Türkmenistanyň 2027-nji ýyl üçin Döwlet býujetiniň taslamasy Mejlisiň garamagyna hödürlendi
mail-icon
altynasyr.newspaper@sanly.tm
EN RU TK

Türkmenistanyň 2027-nji ýyl üçin Döwlet býujetiniň taslamasy Mejlisiň garamagyna hödürlendi

view-icon 861
Türkmenistanyň 2027-nji ýyl üçin Döwlet býujetiniň taslamasy Mejlisiň garamagyna hödürlendi

Hormatly Prezidentimiz Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onuň dowamynda esasy meseleleriň biri hökmünde ýurdumyzyň baş maliýe meýilnamasynyň taslamasy we geljek ýyl üçin durmuş-ykdysady ösüşiň esasy maksatnamalary ara alnyp maslahatlaşyldy.

Ministrler Kabinetiniň Başlygynyň orunbasary H.Geldimyradow Türkmenistanyň 2027-nji ýyl üçin Döwlet býujetiniň taslamasyny taýýarlamak boýunça geçirilen işler barada hasabat berdi. Bellenilişi ýaly, «Türkmenistanyň Prezidentiniň ýurdumyzy 2022 – 2028-nji ýyllarda durmuş-ykdysady taýdan ösdürmegiň Maksatnamasyndan» ugur alnyp, şeýle hem döwlet Baştutanymyzyň degişli Kararyna laýyklykda, geljek ýyl üçin baş maliýe meýilnamasynyň, Türkmenistany durmuş-ykdysady taýdan ösdürmegiň esasy ugurlarynyň hem-de maýa goýum Maksatnamasynyň taslamalary işlenip taýýarlanyldy. Şeýle-de dürli pudaklary, welaýatlary, Aşgabat we Arkadag şäherlerini ösdürmäge gönükdiriljek maliýe serişdeleriniň möçberleri, Döwlet býujetiniň girdeji bölegi barada hasabat berildi.

Hormatly Prezidentimiz hasabaty diňläp, 2027-nji ýyl üçin Döwlet býujetiniň we Türkmenistany durmuş-ykdysady taýdan ösdürmegiň esasy ugurlarynyň hem-de maýa goýum Maksatnamasynyň taslamasynyň işlenip taýýarlanandygyny, geljek ýylyň Döwlet býujetiniň taslamasynda ykdysadyýetimiziň ulgamlaryna düýpli maýa goýumlary gönükdirmegiň meýilleşdirilýändigini belledi. Şunuň bilen baglylykda, döwlet Baştutanymyz Türkmenistanyň 2027-nji ýyl üçin Döwlet býujetiniň taslamasynyň Türkmenistanyň Mejlisiniň garamagyna iberilýändigini aýtdy we degişli hata gol çekdi hem-de wise-premýere degişli işleri geçirmegi tabşyrdy.