Almatyda (Gazagystan) dowam edýän boks boýunça 17-nji dünýä çempionatynda Milli sport we syýahatçylyk institutynyň talyby, Kazanda geçirilen Bütindünýä Uniwersiada-2013-iň çärýek finalçysy Zarip Jumaýew ikinji ýeňşini gazandy. Türkmenabatdan bolan 21 ýaşly sport ussady, Türkmenistanyň ýokary sport ussatlygy mekdebiniň türgeni Mohammad Nazariden (Owganystan) üstün çykyp 52 kilogram agramda iň güýçli 16 boksçynyň hataryna girdi.

Z.Jumaýewiň öz garşydaşyndan artykmaçlygy örän ýokary boldy. Netijede, Puerto-Riko, Kolumbiýa we Polşadan bolan gapdal eminleriň üçüsi hem ýeňşi biragyzdan biziň ildeşimize berdiler – 3:0 (30:27, 30:27, 30:27).

Ilkinji tapgyrda tälimçiler Ýaşuzak Jumaýewiň, Şöhrat Gurbanowyň we Sabir Kseýhanowyň türgeniniň Pakistandan Muhammed Wasimden ynamly üstün çykandygyny ýatladýarys – 3:0 (30:27, 30:27, 29:28).

Çärýek finala çykmak ugrundaky duşuşykda Z.Jumaýewiň garşydaşy bije çekilişik esasynda altynjy belgi astynda çykyş edýän E.Mamişzada (Azerbaýjan) bolar. Ol örän dartgynly ýagdaýda geçen öňýanyndaky göreşinde E.Salasy (Wenesuela) 2:1 hasabynda ýeňdi.