Futbol boýunça ýokary liganyň toparlarynyň arasyndaky Türkmenistanyň çempionatynyň nobatdaky oýunlary geçirildi.Futbol boýunça milli birinjiligiň 14-nji tapgyry Balkanabat şäherinde geçirilen “Balkan” we “Aşgabat” toparlarynyň duşuşygy bilen açyldy. Oýnuň 20-nji minutynda ýer eýeleri myhmanlaryň derwezesine bir pökgüni geçirmegi başardylar. Şeýlelikde, “Balkan” topary ýeňiş gazanyp, 23 utuk bilen çempionatda bäşinji orunda barýar.

Türkmenistanyň Prezidentiniň Kubogynyň iki gezek eýesi “Altyn asyr” topary utuk sanyny barha artdyrýar. Şu tapgyrda ol “Köpetdag” stadionynda “Talyp sporty” toparynyň derwezesine jogapsyz iki pökgi geçirip, birinjiligiň dowamynda on ikinji ýeňşini gazandy. “Altyn asyr” 37 utuk toplap, öňdebaryjy ornuny has-da berkitdi. “Ahal” topary öňdebaryjydan 7 utuk yzda galýar, bu topar ýurdumyzyň demirgazyk welaýatynyň merkezinde “Daşoguz” toparyndan 6:0 hasabynda üstün çykdy.

Türkmenbaşy şäheriniň “Şagadam” topary 26 utuk bilen üçünji orunda barýar, bu toparyň “Bagtyýarlyk-Lebap” bilen duşuşygy 17-nji maýa geçirildi. Bu tapgyryň ýene bir oýny – HTTU – “Merw” duşuşygy hem 17-nji iýuna geçirildi. Futbol boýunça Türkmenistanyň çempionatynyň nobatdaky 15-nji tapgyry 10-njy maýda geçiriler. Şonda “Bagtyýarlyk-Lebap” – “Talyp sporty” we “Şagadam” – “Daşoguz” toparlary duşuşarlar.